1.
Ing kekang kalaban;
kanitang minuna a akasunggalit
a dinian mung late;
busilak nang pusu inaru meng pilit
uli ning nasa mung;
itang kagiwan na keka yang agamit
ban kang managumpe;
king paninapan mu at nasang akamit
2.
Palage mu kaya?
dating kalaban a eni mu kasangga
magbungang masanting;
ing apibalak yung pami-sanib pwersa?
Ing metung at metung;
kekong adwa kaya tapat yang tagana?
O parewu mu ing;
kekayung isipan a pamagbenggansa
3.
Eye kakalingwan;
ing matwang kasebyang e ko bisu-bisu
O mangangas lulub;
king kampu ring taung e mu sadiang hukbu
uling ding patibung;
karin da binili sadyang e mo balu
a kekang pagdusan;
nung sakaling ika karin ka manabu
4.
Ngana ping Balagtas;
nung kanung ing keka deting isagana
mipnu king lugud at;
abakas king lupa ing karelang tula
pakatandanan mu;
king kekang paniatang atin nang magnasa
lihim mong kalaban:
a makapanaya ring akasagupa
5.
Sukat ing sugat a;
maluat nang kinayap e me asalikut
akit meng masala;
king kekang katawan ing melakwan nang byuk
Ing pusu pa kayang;
dininan mung late king tamak a barug
Ing e mamakas king;
kilub ning salu na itang sukal a lub
6.
King pangasuklam na;
arapat mu kayang kabud na mapalis?
king kayang panamdam ;
a malambat na ring panaung tinangis
king pauli niti;
atyu pa king pusu, pagsalbat at aklis
a dating ing aldo;
ing kayablasan na apdu yang mapait
7.
Migising ka kaka;
kanyang tagimpan mung binang mataluktuk
magkang ing ubingang;
kekang pagtiwalan ing keka manuktuk
babo ning sikluban;
nung misan nung nanu ing kekang pinuntuk
ya naman ing ng bage;
a e mu asahang mamukpuk king buntuk
