Ania ang mubo nga paghulagway sa ilang plataporma maoy labot sa pagpalambo sa ekonomiya:
○ Incumbent Mayor Raymond Alvin Garcia – nagtutok sa heritage district, South Road Property (SRP) isip bag-ong central business district, ug creative industry hub; tuyo nga himuong Meetings, Incentives, Conventions, and Exhibitions (MICE) capital ang Sugbo.
○ Konsehal Nestor Archival – mosuporta sa pagbawi sa BPO-IT sector pinaagi sa pakig-alayon sa LGU; ibalik ang job matching programs.
○ Kanhi Customs Commissioner Yogi Ruiz – gustong himuong “pinakaluwas nga Dakbayan” ang Sugbo; mopalambo sa turismo, tinuod nga investors sa SRP, ug paggamit sa yuta sa kabukiran.
○ Kanhi Mayor Michael Rama – nagpasalig sa dugang suporta sa MSMEs, startup hub sa SRP; nag-awhag sa panaghiusa sa tanang sektor sa negosyo.
Gitutokan sa ilang mga plataporma ang paghimo og trabaho, pagdani sa mga mamumuhunan, ug suporta sa micro, small, ug medium enterprises (MSMEs) ug pasayonon ang proseso sa negosyo, gamiton ang digital technology, ug palig-onon ang transparency sa mga operasyon sa City Hall.
Lakip sa gitutokan ang pagpabuhi sa turismo, pagpalambo sa South Road Properties (SRP), pag-amuma sa creative industry, ug paglig-on sa relasyon sa pribadong sektor aron masiguro ang malungtaron nga kalambuan.
Atol sa question-and-answer segment, gipresentar sa mga kandidato ang ilang mga pamaagi aron mapalambo ang competitiveness sa Sugbo, makahimo og daghang trabaho, mapalambo ang innovation, ug masuportahan ang MSMEs.
Gipangutana usab sila bahin sa dugay na nga reklamo sa mga negosyante kabahin sa kabag-ohan sa serbisyo sa City Hall, ilabi na sa pagsunod sa Ease of Doing Business Act (RA 11032).
TUBAG
Plano ni Mayor Garcia:
Gipadayag ni Mayor Garcia ang usa ka three-pronged strategy nga naglangkob sa pagpalambo sa heritage district, SRP, ug creative industry hub. Gipasidunggan niya ang heritage ordinance nga iyang giluwatan nga nagdeklarar sa downtown area isip heritage district aron mapreserba ang kultura ug mapalambo ang turismo.
Plano ni Archival:
Gitutukan ni Konsehal Archival ang pagbangon pag-usab sa business process outsourcing (BPO) ug Information Technology (IT) sector pinaagi sa kolaborasyon tali sa lokal nga kagamhanan ug mga industriya. Gihisgutan niya ang mga programa kaniadto nga nagtugot sa mga kompanya nga motudlo ug mokuha dayon og mga bag-ong graduate alang sa trabaho.
Plano ni Ruiz:
Gibug-aton ni Ruiz ang kaluwasan sa katawhan isip pundasyon sa kalamboan. Nisaad siya nga himuon ang Sugbo nga “pinakaluwas nga dakbayan sa Pilipinas” aron makadani og turista ug mamumuhunan.
Plano ni Rama:
Pasiugdahan ni kanhi Mayor Rama ang kamahinungdanon sa kusganong koneksyon tali sa City Hall ug business sector. Nisaad siya nga “duplihon o triplihon” ang suporta sa MSMEs. Gisugyot niya ang pagtukod og startup hub sa SRP, sama sa mga innovation hubs sa Singapore.
Samtang ang independent candidate nga si Juliette Co wa motambong sa Q&A kay dili maayo ang iyang gibate gumikan sa problema sa panglawas. /
