Usa ka trabahante ang namatay, samtang lima ang naangol human nahugno ang usa ka bahin sa building nga gitukod sulod sa Mactan Economic Zone 3 sa Barangay Basak, Siyudad sa Lapu-Lapu, niadtong Sabado sa gabii, Abril 26, 2025.
Sa report sa Lapu-Lapu City Police Office (LCPO), ang lima ka mga construction worker nga naangol nagpangedaron og 23 ngadto sa 42 anyos.
Ang mga biktima gidala sa pribadong tambalanan sa Barangay Basak ug sa City District Hospital sa Barangay Gun-ob sa maong dakbayan.
Apan ang usa ka 50 anyos nga lalaki nga trabahante nga gidala sa usa ka pribadong tambalanan sa Dakbayan sa Mandaue ang gideklara nga dead on arrival sa attending physician.
Ang tigpamaba sa LCPO nga si Lt. Col. Christian Torres nikumpirmar sa interbyu sa SunStar Cebu sa Lunes, Abril 28, nga nagpadayon pa ang pagbubo og semento sa ikaduhang andana sa maong edipisyo.
Matod niya nga nilusad dayon sila og imbestigasyon human nasayod gikan sa duha ka samdan nga na-admit sa pribadong tambalanan sa Barangay Basak mahitungod sa maong insidente niadtong Dominggo, Abril 27.
“During ongoing concrete pouring on the second floor, the freshly laid section gave way before it had fully set. We are investigating potential lapses or foul play,” matod ni Torres.
Gipasabot ni Torres nga samtang ang Philippine Economic Zone Authority (Peza) adunay kaugalingon’g chartered law, ang insidente nahitabo sulod sa ilang area of responsibility ug kinahanglang tukion og maayo.
Si City Engineering Office head Perla Amar sa buwag nga pakighinabi sa media, niingon nga ang mga estraktura sulod sa Cebu Light Industrial Park (Clip) ubos sa hurisdiksyon sa Peza.
Gipasabot niya nga ang mga edipisyo sa lugar makakuha og permit gikan sa Peza, nga adunay kaugalingong building official ug wala magkinahanglan og permit gikan sa city government. / DPC
