GISUSI sa Land Transportation Office sa Davao Region (LTO-Davao) ang ilang proseso sa aplikasyon sa driver’s license tungod sa nagtaas nga ihap nga aksidente sa kadalanan.
Gisulti ni Yuri Lim, pangulo sa LTO-Davao’s Regional Law Enforcement Section (RLES), nga higpit nilang gisusi ang kasamtangang pamaagi ug rekisitos sa pagbaton og lisensiya sa mga drayber. Kini nga lakang nahitabo human ang datus nagpakita nga kasagaran sa aksidente sa kadalanan nag-ugat sa “human error” inay sa “mechanical failure”.
“Inaantay nalang po namin kung ano yung final sa technical working group from the central office, and of course i-cascade throughout the district offices,” butyag ni Lim atol sa Kapehan sa Dabaw press briefing, Lunes, Mayo 19, 2025, sa SM City Davao.
Iyang gipahimug-atan nga ang kakuwang disiplina sa drayber, ilabi na sa “distracted driving” tungod sa paggamit og mobile phone, maoy dakong rason sa daghang mga aksidente.
Sa Davao City, mga buhatan sa LTO naggunit og 500 hangtud 700 transaksiyon matag adlaw, apil ang driver’s license ug vehicle registration applications. Kini nga ihap nitaas sa hinapos sa bulan o una ang mga deadlines.
Aron sa pagtagad sa road safety concerns, nagporma ang LTO-Davao og task force nga maoy mohimo sa large-scale inspections. Duha ka mga inspection teams ipakatag matag semana aron nga surprisahon sa pagsusi ang Public Utility Vehicles (PUVs) sa ilang mga garahe. Kini nga tim maglakip sa personahe gikan sa LTO ug sa Land Transportation Franchising and Regulatory Board (LTFRB). Bisan unsang depektibo nga behikulo did-an na nga pabiyaheon hangtud nga ang mga isyu maresolba.
Duna sa’y memorandum ang gipagawas aron sa pagpalig-on sa road safety awareness campaign sa tibuok nasud. Mga buhatan sa distrito kinahanglan na nga makiglambigit sa mga drayber sa PUJ, taksi ug bus operators, ug uban pang mga motorista. Paningkamot sa mga trucker groups padayon sa pag-abot sa uban pang mga drayber ug tulunghaan aron nga ma-edukar ang taliabot nga mga mogamit sa dalan. Dugang pa niini, grassroots campaigns ug barangay caravans ang gisugdan na sab aron sa pagpromotar sa responsableng pagmaneho.
Gitin-aw ni Lim nga ang di maayong “road conditions” makatampo sa mga aksidente. Mga bag-ong abli nga mga kadalanan o bypass routes—kasagaran kuwang og suga ug traffic signs—nga nahimong lugar alang sa drag racing ug social media stunts.
Mga daang ruta sama sa Buda Road ug Panacan-padulong-Lasang gisusi sab alang sa posibleng pagpalambo sama sa dugang mga suga ug mga karatula.
Lunes sa buntag, lima ka mga indibiduwal ang naangol sa aksidente alas 5:50 sa kaadlawon sa Davao-Bukidnon National Highway sa Sitio Pagan, Barangay Marilog. Laing aksidente sa dalan nga nahitabo niadtong Mayo 18 sa 2:55 sa hapon sa Daang Maharlika Highway sa Kilometer 27, Licanan, Lasang nikalas og usa ka kinabuhi ug niangol sa lain pang uban. (Rojean Grace G. Patumbon)
