Gipasalig ni Gobernador Gwen Garcia nga magpadayon ang pagbaligya sa tag P20 matag kilo nga bugas sa tibuok Lalawigan sa Sugbo pinaagi sa Sugbo Merkadong Barato (SMB) program, taliwala sa gipatuman nga ban sa Commission on Elections (Comelec).
Ang pasalig gihimo atol sa paglusad sa Department of Agriculture’s (DA) sa tag P20 matag kilo nga bugas sa Sugbo kagahapon, Mayo 1, 2025, nga gipangulohan ni Secretary Francisco Tiu Laurel Jr., sa Capitol grounds.
Ang kalihukan gitambungan nila ni Vice Governor Hilario Davide III, Cebu City Mayor Raymond Alvin Garcia, Tourism Secretary Christina Frasco, ug Deputy Speaker Duke Frasco.
Gisugdan niadtong Mayo 1, ang tag P20 matag kilo nga bugas mapalit sa mga Sugbo Merkadong Barato (SMB) facilities tibuok probinsiya.
Dunay 29 ka munisipyo ug mga component cities sa probinsiya ang nagsugod na sa pagpamaligya sama sa Minglanilla, Naga, Carcar City, Talisay City, San Fernando, Argao, Oslob, Samboan, Santander, Tuburan, Balamban, Asturias, Barili, Aloguinsan, Toledo City, Bantayan, Bogo City, Medellin, Tabogon, Poro, Sogod, Borbon, Compostela, Catmon, Pinamungahan, Ginatilan, Pilar, Tudela, ug Tabuelan. / EHP / Hulagway ni Juan Carlo De Vela
