NAKUGANG ang mga opisyal sa Dakbayan sa Mandaue human masayod nga duha sa ilang aktibong sakop sa Mandaue City Police Office (MCPO) ang gipangkiha tungod sa managlahi nga krimen nga nahimo sa Cebu City.
Si Konsehal Oscar Del Castillo, chairperson sa Committee on Police, Fire, and Penology, nitug-an sa interview niadtong Miyerkules, Abril 9, 2025, nga ang lokal nga kagamhanan mohimo og linain nga imbestigasyon sa pagkasikop sa duha ka polis.
“Ato ning susihon. Nadakpan na man sila, so it’s good that these police officers who violated the law were arrested,” matod Castillo.
Matod ni Castillo nga mangayo sila og official report sa kapulisan aron mahatagan sila og pagpasabot sa pagkasikop sa duha ka polis.
Niadtong Abril 6, si Niesel Arizo Pescante, nga nadestino sa Police Station 6 sa MCPO ug taga Barangay San Vicente, Liloan, Cebu, ang nasikop sa buy-bust sa Barangay Mambaling, Cebu City.
Si Pescante nga nailhan sa alyas nga “Mr. Nice,” nalista nga High-Value Individual (HVI) sa negusyo sa ilegal nga drugas.
Gidakop siya tungod sa kalapasan sa Sections 5 ug 11 sa Republic Act 9165, o ang Comprehensive Dangerous Drugs Act of 2002.
Nakuha gikan sa iyang posisyon ang usa ka gamay’ng pakete nga gituohang shabu nga igbaligya, laing gamay’ng pakete ug duha ka medium-sized sachets.
Ang nasakmit nga drugas gibanabanang mohalin og P408,000.
Sa mao gihapong adlaw , si Police Corporal Ivan Labra, 31, nadistino sa Police Station 3 sa MCPO, gidakop alas 9:00 sa buntag sa Barangay Sapangdaku, Cebu City.
Gipasanginlan siyang nangulata ug nanion og armas ug giingong nanghulga.
Basi sa report, hubog si Labra dihang iyang nasumbagan ang 32 anyos nga si Nerson Rosaceña Almario, taga Sitio Lupa dihang wala siya tubaga sa iyang pangutana kay dunay gipangita nga higala.
Dihang si Almario nideretso og lakaw nga wala magtagad sa pangutana sa polis, gikalitan siya og sumbag.
Ang polis nasakmitan sa iyang 9mm service firearm.
Ang Police Regional Office (PRO) 7 nitataw nga dili nila duphan ang duha ka polis nga nakahimo og kalapasan. / CAV
