Patay ang 16 anyos nga lalaki sa dihang nakuryentihan patay atol sa Valentine’s Day, niadtong alas 11:58 sa gabii, Biyernes, Pebrero 14, 2025 sa Heritage Plaza, Barangay Poblacion, Lungsod sa Sibonga.
Ang biktima giila nga si John, taga Sitio Manga, Brgy. Bahay, Sibonga.
Nasayran sa Superbalita Cebu base sa imbestigasyon ni PMSg Briciel E. Ricaborda nga adunay gipahigayon nga Valentine’s party sa covered court sa maong dapit, ang biktima kuyog sa iyang mga barkada ang naglakaw paingon sa diskohan ug aksidente nga natumban ang electric junction box.
Ang junction box nga maoy gihipusan sa linya sa kuryenti sa maong lugar ang enclosed sa puthaw nga grills, aron nga malikayan ang kawat. Apan namatikdan nga ang maong grills lagyo og gintang hinunga nga milusot ang tiil sa biktima ug natumban ang junction box hinungdan nga nakuryentihan
Gitabang ang biktima sa Deiparine Community Hospital apan nakabsan gyud kini sa iyang kinabuhi. / DVG
