Bisan unsa pay buhaton sa mga opisyal sa transportasyon, basta gaan ra gani kaayo ang silot sa mga malapason sa balaod sa trapiko, di magmatngon ang mga driver sa ilang pagpadagan og sakyanan.
Si Minglanilla Traffic Command (Mitcom) chief Glenn Antigua niingon nga ang mga drayber sa mga trak nga mag-deliver og mga manok kadaghan na diay nila badlunga tungod sa kakusog sa pagpadagan. Apan gahi og mga ulo, wa mopatuo.
Ning pipila ka mga semana nga nakalabay, tulo ka mga trak nga gipangkargahan og mga manok nangaaksidente, duha niini sa dakbayan sa Naga diin duha ka mga kinabuhi ang nakalas. Ang ikatulo nahitabo niadtong Sabado sa udto sa lungsod sa Minglanilla, diin usa ka rider ang namatay.
Kon gibadlong na sila ug wa mopatuo, panahon na nga pahamtangan og silot nga reckless driving ang mga drayber nga nagpasagad lang sa pagpadagan sa ilang sakyanan. Kinahanglan nga tinud-on, di huwaton nga makadisgrasya pa. Mahimo man nga pahimangnoan, hatagan una og tiket sa kalapasan.
Magsige pa gani og lapas, di na tiket ang iisyu, kon di Temporary Operator’s Permit (TOP) kay mas bug-at og multa. Kanang igo nga sila masakitan. Kon driver sa commercial truck ang nalambigit, mamahimong ipatawag ang atensyon sa operator o tag-iya sa sakyanan aron apilon sa pagpahimatngon.
Kon molapas gihapon ang drayber bisan naisyuhan na og TOP, pabug-atan ang silot nga hangtod moabot sa pagtangtang sa lisensya sa pagmaneho hangtod na sa tibuok kinabuhi.
Kon dunay panginahanglan sa pag-usab sa balaod sa trapiko, kinahanglan nga amendahan sa mga magbabalaod.
Karon man gud, bisan duna nay mga kinabuhi nga nakalas sa aksidente, ang drayber makalusot lang gihapon pinaagi sa ammicable settlement.
Nganong di man i-ban sa pagmaneho for life ang drayber nga nakaingon sa aksidente nga dunay namatay o daghan ang nangaangol? Kon mahimo, kuhaan sa prangkisa ang pampublikong sakyanan nga nalambigit sa aksidente samtang ang tag-iya niini, pahamtangan usab og bug-at nga silot.
