Naangol ang 82-anyos nga amahan human gihapak og dos-por-dos nga dunay lansang sa nagmaoy nga anak alas 3:30 sa hapon sa Lunes, Hulyo 15, 2024 sa Brgy. Lanas, Dakbayan sa Naga, habagatang Sugbo.
Si Landrino Villarmea, biyudo, nasamdan sa walang tiil human nitaup ang lansang sa dos-por-dos nga kahoy.
Gidakop sa kapulisan ang iyang anak nga si Vicente Villarme, 54, biyudo, mag-uuma.
Si Police Staff Sgt. Gilbert Ybañez, imbestigador sa Naga City Police Station nga nahinabi sa Superbalita Cebu, nagkanayon nga gialarma ang suspek human nagmaoy sa kahubog, nanapat sa iyang amahan.
Matod ni Ybañez nga ang biktima nibutyag nga nawala iyang P5,000 sayo sa buntag ug iyang gipangutana ang iyang anak kon nakakita ba sa kwarta.
Tungod niini, naghubog-hubog ang anak nga suspek ug nagmaoy sa ilang
panimalay nga gikalisang sa amahan nga tiguwang.
Gitambagan niya ang iyang anak nga dili masuko sanglit wala man niya pasanginli nga maoy nikuha sa P5,000.
Apan nag-wild na man hinuon pag-ayo ang suspek, nibitbit sa dos-por-dos nga dunay lansang.
Ang kahoy iyang gihapak ngadto sa biktima hinungdan nga nitaop sa iyang walang tiil ang lansang nga nagsiwil.
Sa pag-abot sa mga polis, nag-wild gihapon ang suspek bisan kon napusasan.
Ang biktima gidala gilayon sa tambalanan.
Ang biktima nibutyag sa kapulisan nga sa miaging bulan kapin sa P20,000 niyang kawarta nahanaw.
Nahibaw-an niya nga gikuha sa iyang apo, nga anak sa suspek, ang kwarta.
Daghan pa siyang tinigom nga kwarta nga nahanaw lang.
Hinungdan nga iyang gipangutana ang iyang anak kabahin niini apan nasuko naman hinuon, siya giatake.
“Gitigom baya ni nako ang kwarta pension, hinabang sa goberno alang sa akong lubong. Gusto ko nga kon mamatay na ko naa silay magasto sa pagpalubong nako,” kutlo ni Ybañez sa sulti sa biktima kaniya.
Kutob sa iyang nakuptan nga kwarta, mogahin siya og magamit alang sa pagpahiluna sa iyang lubong.
Hinungdan nga naguol ang tiguwang nga gikawat ang iyang kwarta.
Ang amahan nakahukom nga mopasaka og kaso sa iyang anak.
Ang suspek nga nadakpan niangkon sa krimen.
Nahimo niya tungod sa kahubog, ingon man kalagot ngadto sa iyang amahan. / GPL
