Lima ka mga rider ang nangaangol sa upat ka mga aksidente sa motorsiklo sa Sabado, Marso 23, 2024, sa ilang pag-apil sa duha ka adlaw nga motorcycle endurance ride sa Bohol, taho sa kapulisan sa mao nga lalawigan.
Ang unang aksidente nahitabo sa Clarin Bridge, Villalimpia, Loay, alas 6:55 sa buntag sa Sabado.
Ang rider nadasmag sa laing rider dihang mokuha unta og hulagway sa iyang kauban.
Sa mga alas 7:40 sa buntag, laing aksidente nahitabo sa Brgy. Laparan, Jagna human ang rider nawad-an og kontrol sa iyang motorsiklo sa iyang pagkurbada.
Ikatulo nga aksidente nahitabo sa Brgy. Poblacion 1, lungsod sa Sikatuna, alas 10:45 sa buntag.
Duha ka mga babaye’ng rider ang nangalambigit sa aksidente, usa kanila gikataho nga dunay grabe nga angol.
Ang ikaupat nga aksidente nahitabo sa Sityo Pangas , Candabong, Loboc alas 12 sa udto.
Usa sa mga rider nadasmagan sa usa ka commuter van.
Tanang mga biktima daling gipangdala sa labing duol nga tambalanan ug wa pa mahibaw-I ang ilang mga kahimtang sa pagsuwat ning taho. (DVG)
