Kapin sa usa ka gatos ka mga bus, mini bus, van ug taxi drivers sa North Bus ug South Bus Terminal ang gipaubos sa kinalit nga drug test sa Philippine Drug Enforcement Agency (PDEA) 7 sa pakig-alayon sa Land Transportation Office (LTO)7, Land Transportation Franchising and Regulatory Board (LTFRB) 7 ug Highway Patrol Group (HPG) 7 sa buntag sa Martes, Abril 15, 2025.
Kini kabahin sa hugot nga pagpatuman sa seguridad ug kaluwasan sa mga manakayay nga mobiyahe paingon sa probinsiya ug sa mga silingang rehiyon ning panahon sa Semana Santa.
Base sa datos sa PDEA 7 sa unang hugna sa ilang random drug test, adunay tulo ka bus driver ang nigawas nga nagpositibo sa paggamit sa ilegal nga drugas, usa niini driver sa mini bus sa South Bus Terminal samtang ang duha, driver sa Bus sa North Bus Terminal.
Matod ni Leia Alcantara information officer sa PDEA 7 nga ang mga drayber nga nagpositibo sa paggamit sa ilegal nga drugas ilang iduso sa Regional Public Assistance Desk Officers alang sa referral nga mapaubos sila sa drug treatment ug rehabilitation programs.
Hinuon sa tulo ka driver nga nagpositibo, ipaubos sila sa confirmatory test sa PDEA 7 ug kon masuta nga positibo gihapon diha na sila mohatag og rekomendasyon.
Si PDEA 7 Director Alex Tablate nibutyag nga kasamtangan nga imbarguhan sa ilang lisensya ang maong mga drayber sa LTO 7 alang sa administratibo nga silot samtang sila sa PDEA ila kining irekomendar alang sa rehabilitation ilabi na sa mga bag-ong offenders.
“Ang goal nato ani nga ma-maintain ang free ang mga bus drivers nato sa paggamit sa illegal drugs considering nga sila baya ang public transport nato, very important and very critical sa safety sa atong passengers,” matod ni Tablate.
Wala hinuoy kaso nga ipasaka ang PDEA 7, apan ang LTO ug LTFRB sila na ang mohatag og desisyon sa maong drivers.
Hugot usab ang gihimong monitoring sa PDEA 7 sa mga bus terminal lakip na sa mga pantalan aron walay mga kontrabando nga makasulod sa Central Visayas.
Nipakatap sila og mga K9 Unit aron maoy mosusi sa mga bagahi sa mga mobiyahe paingon sa lainlaing dapit sa Visayas Region.
Samtang, gisusi sa hepe sa Police Regional Office 7 Police Brigadier General Redrico Maranan ang mga bus terminal ug pantalan sa Dakbayan sa Sugbo subay sa gipatuman nga hugot nga seguridad sa mga pasahero nga mamauli sa ilang tagsa-tagsa ka probinsiya.
Unang gi-inspection ni Maranan ang South Bus Terminal nga nag-anam-anam og dagsa ang mga manakayay ug gipangsubay ang mga police personnel nga gidestino sa sulod ug gawas sa terminal.
Nidayeg hinuon ang heneral tungod kay nakita niya ang gidaghanon sa mga polis nga niabag sa mga pasahero nga dili maghuot ug mapahimutang kon asa sila mobiyahe. / AYB
