Ang temporaryong pagpahunong sa kagamhanan sa Siyudad sa Sugbo, sa pagbaligya sa bugas nga tag P20/kilo gumikan sa logistikal nga hagit nga dili angay ibalewala.
Gi-angkon ni Cebu City Mayor Nestor Archival nga ang pagpahunong gikinahanglan aron sa pagpahigayon og imbentaryo sa mga stock gikan sa NFA ug FTI, kining lakang timaan sa kakulang sa pre-operational nga pagpangandam.
Ang programa, nga gilaraw aron mahatag ang kahupayan sa priority sectors—gikan sa senior citizens ngadto sa minimum wage earners—dili unta angay mababagan sa dili hingpit nga sistema sa distribusyon human pa sa inisyal nga paglusad niini. Ang taas nga demand maoy hinungdan sa pag-audit, usa ka butang nga giplano unta daan.
Gisuportahan nato ang dinalian nga pag-audit aron masiguro ang kaangayan ug mapugngan ang bisan unsang porma sa hoarding o panic buying. Kini gikinahanglan aron mapanalipdan sa pag-apod-apod.
Ang Siyudad kinahanglan nga mapadali sa pagpahigayon sa tibuok nga inventory check ug pag-reconcile sa mga stock aron mabalik dayon ang serbisyo. Ang matag adlaw nga paglangay nakapaguol niadtong mga pamilya nga nag-agad sa maong subsidy.
Ang gipaabot karon sa publiko dili lang ang kasiguruhan nga “stable ang stock” apan ang tin-aw ug transparent nga plano sa pagpadayon.
Ang “Benteng Bigas” maoy usa ka mahinungdanong interbensyon. Apan ang kalampusan niini masukod dili lang sa intensyon, kundili sa abilidad sa kagamhanan nga mahatag kini nga serbisyo nga makanunayon, hapsay, ug walay aberya.
Kinahanglang hatagan og specific timeline ang pagbalik sa programa.
