Dunay mga panghitabo sa kinabuhi o kontrobersiyal nga sitwasyon nga usahay dili magtuo nga dili dayon masulbad, apan katingad-an nga kalit nga mahusay ug motumaw ang kalinaw.
Ingon nini ang lihok sa espiritu ang Balaang Bata sa Sugbo. Mao kini giingon sa mga deboto, basta si Sr. Sto. Niño, walay imposible.
Sama dihang nagsingabot ang buwan ug semana sa kapistahan ni Sr. Sto Niño, daghang isyo labina sa pagpahigayon sa mga kalihukan sa Sinulog Festival.
Apan ning pipila na lang ka adlaw sa kapistahan sa Senyor karong Dominggo, Enero 21, mitumaw ang kahiusahan sa mga pulitikanhong lider nga dunay managlahing baruganan.
Niadtong Sabado, Enero 13, malampuson ang Sinulog sa Dakbayan sa Cebu City Sports Center (CCSC).
Malampuson usab ang Sinulog sa Lalawigan ubos sa pagpasiugda sa Kapitolyo nga gipahigayon sa samang dapit sa Dominggo, Enero 14.
Apan unang nipadayag si Mayor Michael Rama nga way kalihukan sa Sinulog sa CCSC subay sa gusto ni Gobernador Gwendolyn Garcia, kinsa nisumbalik nga di mosuporta sa Sinulog Fesival sa South Road Properties (SRP).
Subay sa mga negosasyon, nahumok ang ilang balatian ug mitumaw ang kahiusahan. Malampuson ang kalihukan sa CCSC ug ang gobernadayag miawhag sa kalungsoran sa pag-apil sa Sinulog sa SRP.
Manghinaut ug mag-ampo kita nga magpadayon ang paggiya ni Sr. Sto. Niño alang sa luwas, alegre ug malampusong kasaulogan sa Iyang kapistahan ug mga kalihukan sa Sinulog Festival.
Apan kinahanglang molihok usab kita. Maginlabot diha sa pag-ayuda sa hiniusang pwersa sa awtoridad sa pagpatunhay sa kahusay ug kalinaw sa kapistahan.
Matod pa, basta ang Senyor molihok, way imposible. Apan ang pagtuo ug pagsalig Kaniya haw-ang kon way katugbang nga lihok.
Haom kini sa bisan unsa aspeto sa atong katuyoan sa kinabuhi.
Sumala sa karaang panultion gikan sa usa ka linya sa Bibliya, “Lihok tawo kay tabangan ko ikaw,”
