MAG-ATUBANG og kaso ang usa ka Cebu-based vlogger human dakpa sa National Bureau of Investigation (NBI)tungod sa pagmaniubra ug pagpakatap og sayop nga impormasyon nga nagdaot sa presidente sa Pilipinas.
Mga ahente sa NBI Central Visayas nisikop kang Wendelyn Apduhan Magalso sa iyang pinuy-anan sa Lungsod sa Oslob, habagatang sa Sugbo sa gabii sa Marso 20, 2025.
Sa press conference niadtong Marso 21, si NBI director Jaime Santiago nagkanayon nga ilang pasakaan og kalapasan sa Article 154 sa Revised Penal Code (Illegal Use of Publication) in relation to Section 6 of Republic Act No. 10175, nga mas naila nga Cybercrime Prevention Act of 2012.
Gidakop si Magalso tungod sa iyang pagmaniubra sa lehitimong balita nga gipublikar sa TV5 News Network Inc.
Matod ni Santiago giusab ni Magalso ang March 14, TV5 post nga nagdala sa mensahe ni Presidente Ferdinand “Bongbong” Marcos Jr.
Ang orihinal nga post nga gikutlo sa presidente, “Sa laban kontra droga at krimen, hindi natin kailangan dumaan sa madugong solusyon. Ang tamang paraan para tiyakin ang kapayapaan at kaayusan ay sa pamamagitan ng maayos na batas.”
Apan sa gimaniubra, ang sayop ga impormasyon ang gi-post: “Gumawa tayo ng batas na gawing ‘legal’ ang droga sa ating bansa.”
Ang giusab nga quote sa presidente nag-viral sa Facebook, ug naghatag og pagtuo sa publiko nga gisuportahan ang drug legalization.
Niadtong Marso 19, si TV5 Cebu News Supervisor John Aroa pormal nga ni-report sa NBI sa fake post human nasuta nga giusab ang ilang original content. / JJL, CAV
