Tulo ka sityo sa Barangay Inayawan ,Dakbayan sa Sugbo ang naigo sa sunog nga niulbo alas 2:15 sa Sabado sa hapon, Abril 5, 2025.
Ang sunog nilamoy sa 43 ka ka mga panimalay sa Sityo San Isidro Labrador, Lower Lomboy ug sa Mansinitas ug niangol sa tag-iya sa unang balay nga nasunog.
Nakaangkon og 2nd degree burn sa tuong kamot si Mary Grace Cañada, 38, tag-iya sa balay nga giingong unang gikaon sa kayo.
Mga silingan unang nagtinabangay sa pagpawong sa kayo apan tungod sa kakusog sa hangin, dali kaayo kining nakakatap sa ubang kabalayan.
Mga nanglaba sa tabay duol sa unang balay nga nasunog nitug-an sa mga tigbalita nga duna silay nabati nga buto ug gisundan sa kayo ang ilang nakita.
Mga tinugyanan sa Bureau of Fire and Penology (BFP) nihulagway sa lugar nga nagsikit sikit ang balay ug di makasud ang ilang mga fire truck sa interior nga bahin sa maong barangay.
Nagsumpay-sumpay na lang sila sa ilang mga hose aron makakombati sa sunog.
Si SFO2 Wendell Villanueva, tigpamaba sa Cebu City BFP nga nahinabi sa Superbalita Cebu niingon nga giisa nila sa 1st alarm alas 2:23, na under control alas 3:37 sa hapon.
Samtang na fire out ang sunog alas 5:34.
Electrical ang posible nga subayon sa mga imbistigador sa kabomberuhan apan giangkon ni Villanueva nga wa dayon nila mapangutana si Cañada sa hitabo tungod kay na “shock” pa kini.
Mga sakop sa Cebu City Disaster Risk Reduction and Management Office (CCDRMO) pinangulohan ni Retired General Aderson Comar , nitubag sab sa alarma sa sunog.
Si Kapitan Atty. Kirk Bryan Jaca Repollo nimando sa tanang barangay staff sa pag-atiman sa mga nasunogan ug sa ilang mga panginahanglan.
Kasamtangan silang gipabakwit sa Emilio RM Jaca Cultural and Sports Center uban sa mga bakwit nga nasunogan sa Sityo Upper Torre, niadtong Marso 22, 2025.
Mga tinugyanan sa Department of Social Werfare and Services (DSWS) nanglista pa sa mga biktima sa sunog nga hinay hinay nga nangabot sa evacuation center.
Base sa labing uwahi nga talaan sa DSWS moabot na ngadto 234 ka mga indibiduwal samtang sa 55 ka pamilya ang apektado sa sunog nga gibanabanang dunay danyos nga P700.000. / VLM / GPL
