Kadakong salikwaot ning nahitabo sa atong Philippine Team sa Weightlifting competition sa 2024 Paris Olympics.
Tiaw mo bay sa tulo nato ka weightlifters duha ang wala katiwas sa competition.
Kini ra bang weightlifting maoy usa sa atong sentro sa paglaom sa panagtigi didto sa Paris gumikan kay dinhi man ta makakuha sa unang gold medal sa Olympics, kortesiya ni Hidilyn Diaz, upat ka tuig ang nakalabay didto sa Tokyo, Japan.
Unang nag DNF (Did Not Finish) si John Ceniza sa men’s 61kg. Gikataho nga dunay injury sa iyang abaga si Ceniza. Natural lang ning ingon ani kay na injured man.
Ang ikaduhang na DNF si Vanessa Sarno, 20-anyos, kinsa sa iyang tulo ka attempts sa women’s 71-kgs. division sa snatch wala gyuy nahimo. Kini gipahigayon sa South Paris Arena 6 sa Versailles.
Bugtong si Elreen Ando ra ang nakapakita og maayong performance kay nakapatong man kini sa ikaunom nga puwesto human nakasumada kini og 230 kg.
Unya nakakulit pa gyud kini og personal best record sa clean and jerk human kini malampusong nakaalsa sa 130 kgs. Pero sa gihapon wala makaabot sa podium sa matag upat ka tuig nga kompetisyon.
Kini maoy unang higayon sa nasod sa international competition nga duha gyud ang na DNF.
Apan ang makapatingkag sa atong dawunggan mao kining rebelasyon ni Sarno.
Matod niya nga ang usa sa mga rason sa bati kaayo niyang performance mao kining iyang giingon nga “toxic environment.”
Ang taho ni Rey Virgilio Lachica sa Manila Bulletin wa man tuod mo detalyi og maayo kon unsay buot ipasabot sa giingon ni Sarno nga “toxic enviroment,” apan ako nagtuo nga ang gitumbok sa 20-anyos nga Sarno, mao kadtong usa ka coach nga wala nay labot sa ilang team human kini gitaktak, apan tuyo nga niadto sa Paris ug didto nagsamoksamok sa ilang training.
Gusto kining mopapel sa team ug ambot og unsa kini ka tinuod nga nagsige kini og panghaylo ngadto sa mga weighlifter.
Matod pa nga dunay mga picture nga mikatap sa Facebook account nga iyang gipang-post kauban ang mga athlete ug ang accredited coach na hinuon morag nawala sa passing.
Kini maoy angay susihon sa National Sports Association (NSA) ug sa accredited weightlifting group sa nasod kon unsa ni ka tinuod ug unsay ilang mahimo o masilot niini.
Kay kon magpirmi, for sure, gubot pa unya sa lukot ang mahitabo sa 2028 Olympics didto sa Los Angeles.
