Taxi drayber gihimong “punching bag” sa kanhi boksidor hinungdan nga nalaksi ang panit sa iyang tuo nga bahin sa mata.
Ang maong insidente nahitabo niadtong Biyernes sa 7:00 sa gabii, Agusto 23, 2024 sa N. Bacalso Avenue, Barangay Poblacion Pardo, Dakbayan sa Sugbo.
Nanghuboy ang nawong sa biktima nga si Dennis Monacillo, 48, minyo, taxi drayber nga taga-Sunshine Valley, Barangay Quiot, dakbayan sa Sugbo.
Samtang ang suspek nga kanhi boksidor naila lang sa alyas nga Teban.
Base sa inisyal nga nahipos nga kasayuran sa Inayawan Police Station, ubos sa pagdumala ni Police Major Jeciree Basitao nga ang biktima namasahero niadtong higayona.
Si Monacillo nagbiyahe paingon sa downtown area sa Dakbayan sa Sugbo apan mihunong siya sa nahisgutang dapit sa dihang nakadungog nga adunay mipaka sa luyo nga bahin sa sakyanan.
Mikanaog ang maong drayber aron sa pagsusi og unsay milugapak ug nahibaw-an nga nasaghiran ang motorsiklo diin sakay ang suspek ug laing duha ka mga kauban niini.
Inay nga husayon ang nahitabong vehicular accident gitabangan na hinuon og kulata si Monacillo.
Gitabangan og kupot ang biktima sa duha ka mga kauban sa suspek, samtang si Teban maoy nagsige og sumbag kaniya.
Naluya ang biktima sa kasakit sa sinumbagan sa suspek gumikan kay migamit kini og “four finger batsikurno.”
Nasayran nga ang batsikurno sagad ginama sa puthaw nga isul-ob sa mga nagtudlo og self-defense.
Nadakpan ang duha ka mga kauban ni Teban nga sila si Wilson Esparaquera, 59, minyo ug Dennis Zozobrado, 50, pulos taga-Barangay Poblacion Pardo, samtang nakasibat ang kanhi boksidor.
Nag-abot ang biktima ug ang duha ka dinakpan sa Inayawan Police Station diin nagluhodluhod sa pagpangayo og pasaylo sila si Esparaquera ug Zozobrado.
Apan hugot ang baruganan ni Monacillo nga mosang-at og reklamo batok sa mga dinakpan bisan sa tanyag sa duha ka mga dinakpan nga mobayad og P20,000 bugti nga dili sila pasakaan og kaso kay dili sila buot mabilanggo.
Si Monacillo mitubag nga ang P20,000 dili paigo sa kadaot nga iyang nahiaguman ilabi na nga nagkadugo ang tuo nga bahin sa nawong duol sa mata.
“Way mata nga tag-P20,000,” padayag sa biktima.
Dugang pa nga dili siya makapasaylo sa mga dinakpan sanglit apektado ang iyang pamilya kon siya mabuta sa higayon nga dili na siya makamaneho nga maoy gibuhi niya sa iyang pamilya. /GPL, dugang taho ni DVG
