SUBLING gipasibaw ang dugay nang lig-ong relasyon tali Okinawa, Japan ug siyudad sa Davao sa pagduaw sa siyudad sa delegasyon nga gipangunahan ni Okinawa Vice Governor Hon. Oshiro Hajime.
Tumong niini ang usa ka courtesy visit ngadto kang Acting Mayor Sebastian Duterte sa The Royal Mandaya Hotel, Hulyo 23, 2025.
Sa pulong, gipaabot ni Vice Governor Oshiro ang iyang kalipay sa mainitong pagdawat sa dakbayan sa delegasyon ilabi na kay kini ang labing unang higayon niya sa siyudad. Iyang giila ang lawom nga kultural nga relasyon sa mga taga-Okinawa ug mga Dabawenyo nga naumol sukad pa niadtong World War 2.
Positibo ang Vice Governor alang sa dugang kolaborasyon sa dakbayan, lakip na ang paghatag og oportunidad sa mga Pinoy gikan sa siyudad nga makapuyo, makatrabaho, o makatungha sa Okinawa.
Si Acting Mayor Baste nipadayag sab sa iyang dakong dungog nga mahimamat ang samang mga tag-as nga opisyal gikan sa Japan. Iyang gilauman ang paghatag og posibilidad sa usa ka direct air connectivity tali Davao ug Okinawa nga makatabang og dako sa turismo ug uban pang kalamboan.
Miduyog sab sa maong courtesy call ang mga konsehal sa dakbayan nga sila Atty. Rachel Zozobrado, Myrna Dalodo-Ortiz, Ragde Niño Ibuyan, Ms. April Marie C. Dayap, ang officer-in-Charge sa Davao City Investment Promotion Center (DCIPC); ug Harvey James Lanticse, ang Officer-in-Charge sa City Information Office (CIO). (July Aubrey R. Ngo/CIO-Davao)
