NAA na sa luwas nga kahimtang sa sulod sa usa ka pribadong tambalanan ang pulis nga naangol human maigo sa pagpamusil sa gi-alarmahan nga armadong tawo sa Barangay Pahina Central sa Dakbayan sa Sugbo sa Huwebes sa hapon, Marso 27, 2025.
Si Police Senior Master Sergeant Allen Abellanosa, sakop sa Special Weapons and Tactics (SWAT), nasamdan sa iyang walang bukton ug natapsingan sa iyang walang kilay gamit ang kalibre 45 nga pistola sa napatay nga suspek nga si Ricardo Regidor alyas Cardo.
Matod ni Police Colonel Maria Theresa Macatangay, deputy city director for operation sa Cebu City Police Office (CCPO), nga girekomendar nila nga hatagan og Medalya ng Sugatang Magiting kun PNP Wounded Personnel Medal si Abellanosa.
“With his gallantry we will be endorsing him for an award naa tay gitawag nga Medalya ng Sugatang Magiting (PNP Wounded Personnel Medal),” matod ni Macatangay.
Mibutyag si Macatangay nga sa dihang na trap na sa duha ka SWAT personnel si Regidor sa sudlonong bahin sa maong barangay mipabuto kini sa iyang pistola tulo ka higayon og naigo si Abellanosa, hinungdan nga ila kining gibawsan.
Gumikan sa maong insidente, subling gipahimangnuan sa CCPO ang tanang personnel niini nga kung motubag og alarma ilabi na sa mga armadong tawo dili angayan nga mokompyansa aron dili mabutang sa peligro ang ilang kinabuhi.
“With this we are reiterating our guidance to our PNP personnel to always exercise prudence and due diligence and if possible to be ready and with their firearms on hand not just holster when they are responding to this kind of alarm,” dugang ni Macatangay. (AYB)
