Prisuhon ug pamultahon og P30,000 ang bisan kinsang residente o magpapatigayon nga molapas sa lagda sa Siyudad sa Danao sa mga gitugot nga gamiton o ibaligya nga mga pabuto atol sa Pasko ug Bag-ong Tuig.
Kini subay sa giluwatan nga Executive Order No. 71 ni Danao City Mayor Thomas “Mix” Durano nga naglatid sa mga giya alang sa mga residente ug mamaligyaay og mga pabuto.
Sa lagda, gikinahanglan nga molukat og business permit gikan sa opisina sa mayor ang tanang mobaligya og firecrackers, fireworks ug ubang pyrotechnic devices.
Ang gitugot nga mga pabuto naglakip sama sa Baby Rocket, Bawang, Small Triangulo, pulling of strings, paper caps, El Diablo, Watusi, Judah’s belt, ug Sky Rocket.
Sa pyrotechnic devices, gitugot lang ang paggamit o pagbaligya sa mga sparklers, luces, fountain, jumbo regular ug special, roman candle, trompillo, airwolf, whistle device, butterfly ug uban pang pyrotehnic devices.
Ugaling makakuha na sa permit, gikinahanglan usab nga mo-display sa mga paninda sa labing luwas nga lugar subay sa lagda sa Bureau of Fire Protection (BFP).
Gitugot lang ang pagpamaligya sa Siyudad sugod sa Disyembre 9, 2023 hangtod sa Enero 2, 2024.
Apan gikinahanglan nga ang ibaligya mosubay sa listahan nga gihatag sa lokal nga kagamhanan.
Ang mosupak niini mag-atubang og kaso ug pamultahon.
Gibuhat kini sa kagamhanan aron masiguro nga luwas ug hapsay ang pagsaulog sa holiday season. Ilabi na ang paglikay usab sa bisan unsang insidente sama sa sunog ug disgrasya.
“Kining executive order gihimo aron maminos o malikayan ang injuries..” pagpasabot sa LGU.
