Usa ka concerned citizen ang nitawag sa Consolacion Police Station ug nagpahibalo bahin sa patay nga tawo nga naglutawlutaw sa kadagatan sa Mactan Channel sa tungatunga sa siyudad sa Lapu-Lapu ug sa Brgy. Tayud sa Consolacion, alas 11 sa buntag, Dominggo, Marso 24, 2024.
Ang mga sakop sa Philippine Coast Guard ug Bantay Dagat mao ang ninghimo sa operasyon sa pagkuha sa lawas sa wa pa mailhing lalaki.
Ang maong lalaki gibanabanang nagpangidaron kini 50 ngadto sa 60 anyos ug gituhoan nga usa kini ka mananagat nga nalumos gumikan sa kabaworon sa dagat.
Ang patay unang gidala sa sa Eversly Child Sanitarium Hospital sa Brgy. Jagobiao sa siyudad sa Mandaue aron paghiling lawas niini.
Atol ning pagsuwat, nagpadayon ang imbestigasyon ni Police Staff Sgt. Roel W. Aquino sa Consolacion Police ubos sa kamandaon sa ilang hepe nga si Police Lt. Col. Verniño Noseralle. / DVG
