Moabot ngadto sa P23.9 milyunes nga balor sa ilegal nga drugas ang nasakmit sa mga sakop sa Philippine Drug Enforcement Agency (PDEA 7) ug kapulisan sa Central Visayas atol sa managlahi nga anti-illegal drug operations sulod lang sa usa ka adlaw.
Gilusad ang buy-bust sa PDEA 7 uban sa Naval Forces Central, Police Drug Enforcement Group-Special Operations Unit ug Mandaue City Police Office (MCPO).
Unang mga operasyon batok sa managkapuyo nga nakuhaan og kinatibuk-ang P13.5 milyunes sa gituohang ilegal nga drugas.
Alas 2:45 sa Dominggo sa hapon, Mayo 19, 2024, unang operation nahitabo sa Aboitiz Road, North Reclamation Area, Brgy. Subangdaku, Mandaue City nga niresulta sa pagkasikop ni Fatima Veraces, 28, taga Mambaling, Dakbayan sa Sugbo.
Nakuha gikan kaniya ang 1,500 grams nga gituohang shabu nga dunay estimated average market value nga P10,200,000, buy-bust money, cellphone ug ubang ebidensya.
Pagka alas 4:33 sa hapon, nilusad sila og follow up operation uban sa kapulisan sa Lapu-Lapu sa Sitio Soong 2, Brgy. Mactan nga nisangpot sa pagkasikop sa live in partner ni Veraces nga si William Lopez Jr, 32.
Nakuha sa mga operatiba ang unom ka pakete sa shabu nga motimbang og 500 gramos nga mobalor og P3,400,000, lakip na ang buy-bust money, gray nga multicab ug uban pa.
Kasamtangan nga gi-turnover ang mga ebidensya sa buhatan sa PDEA alang sa chemical analysis.
Matod ni Leia Alcantara, information officer sa PDEA 7, migawas ang ilang mga ngalan sa dihang duna silay nadakpan nga drug personality diin sila ang gitudlo nga tinubdan sa supply.
Sila ang giingong tig-supply sa mga drug player sa Metro Cebu ug ubang mga dapit sa lalawigan sa Sugbo.
Tungod sa kadaghan sa ilegal nga drugas nga nakuha gikan kanila, giila na sila nga dako nga drug player sa CV.
“Na identify to sila through a confidential informant then naa tay arrested this year, sila pud ang source. Source ni sila sa Metro Cebu and Cebu province,” matod ni Alcantara.
EX-CON
Laing high value individual nga kanhi binilanggo sa Cebu City Jail nadakpan sa mga sakop sa Regional Police Drug Enforcement Unit 7 uban sa Regional Intelligence Division 7 atol sa buy-bust sa Quijano Compound, Brgy. Calamba, Cebu City alas 10:05 sa Dominggo sa gabii sa Mayo 19, 2024.
Ang suspek giila nga si Romelito Ygoña Flores, 48, alyas Mitong, kinsa nabilanggo na kaniadto sa sama nga kaso.
Nasakmit sa mga operatiba ang mga binulto sa gituohang shabu nga motimbang og 1,525 nga dunay standard drug price nga P10,370,000.
Sa imbestigasyon sa kapulisan nasuta nga ang tinubdan sa supply sa ilegal nga drugas ni Flores gikan sa usa ka codename AR nga manawag lang niya kon ideliver na kini. / AYB
