Nabutang sa number 4 sa most wanted person sa provincial level sa Sugbo tungod sa kasong rape by sexual assault nadakpan sa kapulisan, alas 8:55 sa buntag sa Huwebes, Nobiyembre 23, 2023, sa Sitio Laray, Barangay Carreta, dakbayan sa Sugbo.
Ang akusado giila nga si Jomar Canceller, 34, molupyo ra usab sa naasoy nga lugar nga dunay warrant of arrest nga giluwatan ni Presiding Judge Stephen Ian Belacho, sa Branch 22 sa Regional Trial Court (RTC) sa dakbayan sa Sugbo nga penitsahan og Nobiyembre 20, 2023 nga dunay gitugot nga piyansa nga P180,000 alang sa iyang temporaryong kagawasan.
Si Police Lieutenant Colonel Jomar Medil, hepe sa City Investigation and Detective Management Unit (CIDMU) sa Cebu City Police Office (CCPO) maoy nangulo sa pag-serve sa warrant batok kang Conceller.
Matod ni Medil, ang kapulisan sa dakbayan nihingusog sa ilang kampanya batok sa wanted persons ilabi na sa kaso sa pagpanglugos aron dili na makabiktima.
Kasamtangan nga gibalhug sa custodial facility sa CCPO ang akusado ug gitakdang i-turnover sa korte nga maoy niluwat sa warrant of arrest.
