Nidangop sa National Bureau of Investigation (NBI) Central Visayas ang pamilya ug kabanay sa 83-anyos nga ginang nga napalgang patay ug nabuwag ang ulo sa lawas niini diha sa iyang panimalay sa Barangay Candabong, bukirang dapit sa Lungsod sa Dumanjug niadtong Pebrero 1, 2025.
Kini tungod sa tinguha nga mas mahatagan og katin-awan ang hinungdan sa kamatayon sa ginang nga si Miguela Pocong Barino.
Ang pag-umangkon niini nga si Loreta Contratista, 43, nipasabot nga bisan pa man og duna nay pasiunang imbestigasyon nga gihimo ang kapulisan, gusto nilang matino ang uban pang mga posibilidad sa hinungdan sa kamatayon niini pinaagi sa pagpaubos sa autopsy sa patay nga lawas sa biktima.
“Among tuyo nga ipa-autopsy og balik among nanay nga namatay unya ilubong ra dayon so mao nay among gikasabutan tibuok pamilya. Gusto lang gyud mi masayod nganong iyang ulo nabulag sa lawas kay kon ataki to siya Sir, kay ang amo lang pangutana nganong nabulag ang ulo kay mao ra man daw to ang giingon sa polis nga gikaon sa iro maong nabulag ang ulo ug lawas,” matod ni Contratista.
“Sa among hunahuna anaa gyuy binuang pero dili makasulti kinsa or unsa ba kay lisod kaayo magpataka mi og istorya,” dugang niya.
Gidawat ni Atty. Renan Agustus Oliva ang request sa pamilya ug gitakda nga ipaubos kini sa maong proseso sa mosunod nga mga adlaw.
Matod ni Oliva nga iyang gi-request ang medico legal gikan sa Kaulohan nga maoy mosusi sa patay nga lawas sa biktima.
Apan gikinahanglan una ugkaton ang patay nga lawas sanglit nalubong na man kini.
“Nakadawat na ta sa complaint sa request for assistance ang una natong buhaton mag request ta for exhumation ang among medico legal gikan sa medico legal division to conduct the autopsy,” matod ni Oliva.
Gidugang ni Oliva nga ang pagsusi nga ilang buhaton dili motapos sa autopsy lamang apan mas paladman pa ang imbestigasyon pinasubay usab sa mga inpormasyon nga makuha gikan sa kapulisan sa Dumanjug ug Scene of the Crime Operation (Soco).
Basi sa pasiunang imbestigasyon sa Soco, giingong wala kini nakitang foul play sa kamatayon.
Nagtuo usab ang kapulisan nga posibleng gikaon sa iro ang bahin sa lawas sa biktima.
“Ni-suggest mi sa requesting party nga iapil nato ang investigation as to the cause of death kay autopsy is only one part of the investigation. We will also be coordinating with Dumanjug Police Station who conducted the investigation as well as the Soco,” dugang ni Oliva. / ANV
