Namatay human nahagbong ang usa ka 17 anyos nga truck helper nga natulog sa atop sa delivery truck van sa usa ka dakong kompaniya sa gatas, pasado alas 6 sa buntag sa Sabado, Hulyo 27, 2024.
Ang delivery van unang nagpundo sa daplin sa dan tungod sa Petron gas station sa national highway sa Barangay Poblacion, lungsod sa Sibonga, habagatang Sugbo.
Ang 17 anyos nga truck helper taga Sityo Cogon, Barangay Maribago, Dakbayan sa Lapu-Lapu.
Sa imbestigasyon sa kapulisan sa Sibonga ubos sa kamandoan sa ilang hepe nga si P/Capt. Feb Abadillas Seares nasayran sa Superbalita Cebu nga ang drayber sa van mao si Jorel Comission Cole, 24, taga Maribago, Lapu-Lapu City.
Matod ni Cole, alas 11:50 sa gabii, Biyernes, Hulyo 26, 2024, sila niabot sa maong dapit. Kay sirado pa ang tindahan nga ilang hatdan sa mga produkto, nag-park una sila sa dapit ug ang maong truck helper natulog sa ibabaw sa van.
Samtang, ang drayber ug ang laing truck helper didto nangatulog sa front seat.
Sa pagmata ni Cole sa alas 6:35 sa buntag, iyang gisugo ang laing truck helper nga pukawon ang kauban nga natulog sa atop aron moirog sa unahan ang cargo truck van.
Ang biktima, sa pagpukaw, nitubag pa kini nga siya mobalhin sa sulod. Apan wa kini nibangon. Didto na ang drayber nipaandar sa trak dayon nipaabante og mga 15 metros ug nibalik sa pag-park.
Apan paggawas sa drayber, ang biktima nakit-an na lang nga nalup-og sa karsada kay nahagbong gikan sa van.
Ang biktima gidali sa pagtabang ug gidala sa Deiparine Community Hospital sa mga responder sa Sibonga apan gideklarar kini nga dead on arrival sa attending physician nga si Dr. Najeem Pualt.
Ang 17 anyos nakaangkon og grabing samad sa ulo.
Ang drayber gikustodiya sa kapulisan sa maong lungsod ug nagpaabot sa kaso nga ipasaka batok kaniya nga reckless imprudence resulting to homicide. / DVG
