Tiggama og putos nga sudlan og shabu nadakapan sa buy bust sa alas 7:25 sa buntag, Martes, Enero 7, 2025 sa Sityo Paula Maria, Barangat Inayawan, Dakbayan sa Sugbo.
Si Marciano Cases Suazo, 49, anyos minyo kanhi e-bike driver ug residente sa naasoy nga dapit ang napusasan sa mga sakop sa Special Drugs Enforcement Units sa Inayawan Police Station ug lakip sa napusasan iyang higala nga si Jowel Sierot, 46.
Nakuha sa ilang posesiyon ang pito ka gamay’ng pakete sa shabu, usa ka medium size nga putos, P200 buy bust money ug 5.20 gramos shabu nga gibanabana nga mokantidad og kapin sa P30,000.
Si Suazo nga nahinabi sa Superbalita Cebu niingon nga wala na siyay laing pangita hinungdan nga napugos sa paghimo og sudlanan sa shabu.
Gipadayag niini nga wala na siyay e-bike kay gibaligya sa iyang asawa, samtang wala na sab siyay trabaho isip helper sa construction.
“Wala koy mahimo mintras tanto wala pay trabaho, asa man ta modagan alang-alang mangawat ta,” dugang ni Suazo.
Dunay mo-order niya og 400, 500 ngadto sa 1,000 ka putos sa tag-P1 ang usa.
Dugang pa ni Suazo nga sa iyang pagkabilanggo iya nalang atubangon ang maong kaso. / GPL
