Duha ka batan-ong mga lalaki, usa kanila menor, nangamatay human mabangga sa usa ka tourist bus alas 4:20 sa kaadlawon sa Dominggo, Nobiyembre 19, 2023 sa N. Bacalso Ave., Brgy. Langtad, dakbayan sa Naga, habagatang Sugbo.
Ang duha nga nangamatay gituohang hubog kay nag-ikis-ikis ang ilang dagan samtang nagsubay sa karsada.
Base sa nakuhang kasayuran sa Superbalita Cebu gikan sa kasaligang tinubdan, giila ang mga nangamatay nga sila si Klyde Rosada, alyas Baldo, 18, grade 11, ulitawo, ug si Joshua Canceran, 16, grade 9, managsilingan sa Brgy. Gairan sa maong siyudad.
Sa walo ka mga Taiwanese national nga mga turista nga nangaangol, duha kanila mga bata.
Sila giilang si Huang Siwei, 28; Liu Yichun, 26; Wang Yutong, 40; Lin Hsinying, 17; Xu Kexin, 25; Peng Chihui, 26; Peng Chihui, 9; ug Peng Shihchun, 7.
Ang tourist bus nga gisakyan sa mga turista nga gimaneho ni Richard Varga, 49, minyo, taga Sityo Batong, Brgy. Danlag, lungsod sa Consolacion, Sugbo, gikan sa Cebu City.
Padulong unta sila sa Brgy. Tan-awan, Oslob, habagatang Sugbo alang sa whale watching.
Pag-abot sa dapit, giingong ilang nasugatan ang nag-ikis-ikis nga motorsiklo nga gimaneho ni Rosada samtang angkas si Canceran.
Si Varga nisuway sa paglihay kanila apan nadasmag gyud ang motorsiklo nga napasok sa ilawom.
Human mabangga, ang bus nilahos ug nabangga sa kongkretong pader sa tindahan nga niresulta sa pagkaangol sa walo ka mga turista.
Sa interview sa Superbalita Cebu kang Police Lt. Col. William Homoc, hepe sa kapulisan sa dakbayan, iyang gibutyag nga dunay amicable settlement tali sa mga pamilya sa duha nga nangamatay ug operator sa bus pinaagi sa paggasto sa haya ngadto na sa paglubong.
Pabayran usab ang motorsiklo nga naguba.
Matod ni Homoc nga minor injuries lang ang naangkon sa walo ka mga turista nga gipangdala sa ACE Medical Center sa Pardo, siyudad sa Sugbo.
