Lalaki nga mokarnap unta sa motorsiklo sa polis napatay sa pakigpinusilay tali sa kapulisan sa Huwebes sa buntag, Nobiyembre 23, 2023 sa Barangay Lusong, Buenavista, Bohol.
Ang suspek nga giila nga si Richard Japillo, caretaker sa usa ka fishpond sa San Jose, Getafe, Bohol, mokarnap unta sa motorsiklo ni Patrolman Benzon Ascension, sakop sa Ubay Municipal Police Station sa mga alas 9 pasado sa buntag.
Iya pang nailog ang pusil ni Ascension ug gipusil makaduha ang polis apan maayo na lang wa makaigo.
Usa ka concerned citizen nanawag sa kapulisan ug niresponde ang mga polis sa Buenavista Police Station pinangulohan ni Police Capt. Agosto Cesario Sumaylo.
Sa pag-abot sa dapit, ilang nasayran nga si Japillo nisulod sa usa sa mga classroom sa Lusong Elementary School aron motago.
Matod sa kapulisan nga ilang gikombinser si Japillo sa pagtahan apan gipamusil sila gamit ang service firearm ni Ascension.
Bisan pa niini, nakignegusasyon ang mga polis kaniya sulod sa dul-an usa ka oras aron pagpatahan kaniya.
Inay motahan, namusil na sab siya hinungdan nga napugos ang mga polis sa pagbawos.
Ang suspek nga nagpasalipod sa kongkretong bungbong ug mga furniture naigo sa nagkadaiyang bahin sa lawas.
Gidali siya sa pagdala sa Rural Health Unit (RHU) apan gideklarar ni Dr. Marivic Chua nga patay nang niabot.
