NAKABSAN sa iyang kinabuhi ang apohan ug ang iyang apo nga batang babaye human gitigbas sa usa ka construction worker sa alas 2 sa kaadlawon sa Lunes, Marso 31, 2025, sa Purok Lumboy, Brgy. Panangban, Lungsod sa Compostela.
Ang apohan nga si Evelyn Pareja Jayme, 68, biyuda, nakaangkon og samad tinigbasan sa ulo, samtang ang iyang apo nga si Gael Jayme Cogay, 5 anyos, nasamdan sa liog.
Naangol sab si Ruvelyn Jayme Gomez, 38 anyos, kinsa natigbasan sa agtang, ang iyang bana nga si Kelly nga nakaangkon og samad tinigbasan sa nawong ug anak nga si Clint Justine, 16 anyos, nga natigbasan sa bukton.
Human sa hitabo, nasikop ang suspek nga si Jayson Meca Avila, 41 anyos, usa ka construction worker nga dunay kapuyo nga pag-umangkon ni Evelyn.
Si Police Senior Master Sergeant Junrey Frias, imbestigador sa Compostela Police Station, nibutyag sa Superbalita Cebu nga ilang gituohan nga sabog si Avila sa ginadiling drugas atol sa insidente, sanglit naila kini sa ilang lugar nga nagumon sa ilegal nga drugas.
Matod ni Frias nga nasina ang suspek sa biktima human niya nahibaw-an nga mao kini magsige og sumbong sa iyang asawa nga nagtrabaho sa gawas sa nasod.
Sukad nahibaw-an sa asawa nga nagbisyo sa drugas ang iyang bana, adto na siya mopadala og kwarta sa biktima para sa iyang mga anak ug wala na ipaagi sa iyang bana.
“Kining suspek naglagot sa mga biktima kay wala na tagda sa asawa naa sa gawas sa nasod. Nagbisyo na man ni siya unya kining paryente nga biktima mao na may padalhan, nasuko,” matod ni Frias.
Ang suspek naabot sa lugar niadtong Dominggo, pipila ka oras sa wala pa ang hitabo.
Una niyang gisulod ang panimalay ni Evelyn og iya kining gitigbas sa ulo samtang natulog ug iyang gisunod ang apo nga diha sulod sa moskitero ug gitigbas ang liog niini.
Human niya napatay ang duha, nibalhin siya sa tupad nga panimalay og gitigbas sa bukton si Clint Justin nga natulog sa sala apan nakaambak sa bintaha.
Gisunod sa suspek si Rubelyn nga naghigda sa lawak ug gitigbas sa nawong.
Ang bana nga si Kelly dali nga nidagan sa nahimutangan ni Rubelyn apan gitigbas usab siya sa nawong.
Bisan kon samaran, si Kelly nakamaneho pa pag-ilog sa sundang ug sa iyang kalagot, iyang gibunalan og martilyo ang nawong sa suspek.
Ang maong hitabo naka-mugna og kaguliyang sa lugar ug nangmata ang mga silingan kinsa nagpatabang sa mga tanod aron dakpon ang suspek.
Narekuber sa crime scene ang sundang ug martilyo. Kasong double murder ug frustrated murder ang ipasaka batok sa suspek. / GPL
