NAKURYENTIHAN ang usa ka trabahante sa usa ka establisemento sa Barangay Pajo, Dakbayan sa Lapu-Lapu, niadtong Dominggo, Abril 6, 2025.
Ang biktima nga anaa na sa luwas nga kahimtang nakaangkon og daghang paso sa kalawasan.
Ang Mactan Electricity Com–pany Inc. (Meco) nitaho nga adunay pipila ka dapit duol sa airport ug sa Mactan industrial zone nga nawad-an og kurente nunot sa maong hitabo.
Sa taho sa Lapu-Lapu City Police Office, ang 43 anyos nga biktima nga taga Mindoro nag-ayo sa bintana sa maong establisemento nga nahimutang sa eskina MV Patalinghug Street ug ML Quezon Highway.
Samtang nagputol sa aluminum tube, wala tuyoa nga natandog ang usa ka live wire, hinungdan nga mi-spark kini ug nakurentihan ang trabahante mga alas 3:40 sa hapon niadtong Dominggo.
Ang naangol nga temporaryong nagpuyo sa bunkhouse sa maong edipisyo daling gidala sa Lapu-Lapu City District Hospital aron ma-tambalan.
Giawhag sa Meco ang publiko nga pahibaw-on sila kung magtrabaho duol sa mga nag-unang linya sa kuryente aron malikayan ang mga disgrasya ug masiguro ang kaluwasan. / DPC
