Spanish national nga gituohang gibikugan samtang nag snorkeling patay na nga napalgan alas 3 sa hapon sa Biyernes sa Brgy. Basdiot, lungsod sa Moalboal, Sugbo.
Si Jorge Oliva, 26, ulitawo, kasamtangang nagpuyo sa nahisgutang lugar, patay na nga napalgan sa kapulisan, divers sa Philippine Coast Guard (PCG) ug volunteers nga nangita kaniya.
Si Police Captain Etelberto Timagos, hepe sa Moalboal Police Station Station nga nahinabi sa Superbalita Cebu sa Sabado pinaagi sa telepuno, nagkanayon nga Oktubre 24 sa buntag niabot ang biktima.
Kini basi sa gibutyag ni Anna Marie Amado, 35, dalaga, tag-iya sa Home Sweety Home Stay.
Sumala pa niini nga alas 11:30 sa buntag sa Oktubre 25, niadto si Oliva sa Panagsama Beach, 500 metros gikan sa giabangan nga gipuy-an.
Ang biktima nangabang og kahimanan sa snorkeling nga naglakip sa GoPro camera ug uban pa. Siya gitambagan sa tigparenta nga magkuha og guide, apan nibalibad.
Apan naabot na lang og hapon hangtod sa gabii, wala nitunga ang biktima. Nagtuo ang tigparinta nga basin dunay gikaila busa wala dayon iuli ang giabangan nga gamit.
Ang tag-iya sa room natingala sab, ilang gitawgan sa selpon apan wa nitubag.
Pagkabuntag sa Oktubre 26, gipahibalo nila sa barangay ngadto na sa kapulisan ang pagkawala ni Oliva. Matod ni Timagos, nga na blotter kini nga missing person.
Pagka Biyernes sa buntag, Oktubre 27, ang kapulisan nakig-alayon sa local government unit ingon man sa PCG aron pangitaon si Oliva. Dunay mga langyaw nga divers nga bulontaryong ningtabang sa search and rescue.
Hangtod nga nakit-an nila ang biktima alas 3 sa hapon sa Biyernes nga diha sa 14 ka tiil nga gilawmon sa dagat.
“Tan-aw namo, gibikugan ni siya, kumpyansa. Gitambagan nga magkuyog og guide, nibalibad” dugang ni Timagos.
Giklaro niini nga way foul play ang kamatayon sa biktima ug di sab hubog dihang nisawom ug intact ang iyang tanang mga gamit intact.
