Taliwa sa grabe nga kainit sa panahon dala sa El Niño phenomenon, pipila ka mga dapit sa lalawigan sa Sugbo nangaigo sa mga grass fire ning nanglabay nga mga adlaw.
Halos dunay mga grass fire kada adlaw.
Ang labing dako, hayan labing una sa Sugbo, niigo sa gibana-banang 70 hektarya sa mga luna sa upat ka mga barangay sa lungsod sa Oslob, habagatang Sugbo niadtong Sabado.
Ang nangaapektuhan mao ang Brgy. Poblacion, Cañang, sityo Upper, Calumpang ug Daanlungsod.
Ang mga dapit nga nangaigo nahimutang sa ibabaw ug may bukiran sab.
Matod sa kabumberohan sa lungsod nga mga alas 5 sa hapon ilang unang nadawat ang alarma, apan mga alas 11:15 sa gabii na under control ang kayo.
Hingpit kini nga napawong sa Dominggo sa alas 2:15 sa kaadlawon, Abril 7.
Matod ni SFO1 Pitz John Romeo, fire investigator sa Bureau of Fire Protection (BFP) sa Oslob, nga wa hinuoy naapil nga mga balay kay kasagaran niini naa ra daplin sa karsada,
Kadtong girumbo na unta sa kayo, ang mga lumolupyo nagtinabangay sa pagpawong pinaagi sa pagdagpas sa nagdilaab nga mga sagbot ug kahoykahoy.
Matod ni Romeo nga nagsugod ang grass fire sa sityo Upper Brgy. Calumpang.
Ang nangasunog mao ang laya nga mga tanglad.
Gumikan kay hangin dali kaayo’ng nikatap ang kayo sa uban pang mga barangay.
Si Romeo nagkanayon nga layo nga bukid ang nangaigo sa kayo, gibana-bana nga dunay gilay-on nga lima ngadto sa unom ka kilometro gikan sa kinapusoran ug tungason kaayo ang ubang mga dapit nga apektado.
Siya nagkanayon nga wa sila nangayo og back up sa laing kabumberohan sa ubang mga lungsod kay kaya ra nila ang pagpawong pinaagi sa tabang sa mga lumolupyo sa upat ka mga barangay inabagan usab sa mga personnel sa Municipal Disaster Risk Reduction and Management Office (MDRRMO) sa Oslob.
Si Romeo niingon nga ila pang susihon kon unsay hinungdan sa sunog nga unta layo ra sa mga tawo ang Upper Calumpang.
Matod niya nga way danyos kay pulos mga sagbot ang nangasunog, wa gani mga kahoy.
SIBONGA
Usa usab ka grass fire ang niigo sa lungsod sa Sibonga niadtong Sabado, dungan sa Oslob.
Ang naigo mao ang Purok Tambis, Brgy. Magcagong.
Sa usa ka post ni Sally Repomte Natividad, siya niingon nga dako nga umahan ang naigo.
Laing grass fire usab ang niigo sa Brgy. Labatan, lungsod sa Liloan, amihanang Sugbo ug sa Lapaz Blizz, dakbayan sa Bogo, mga dapit sa amihanang Sugbo. / DVG
