Padulong na unta mopauli human sa iyang duty ang usa ka head guard dihang gipusil-patay alas 8 sa gabii sa Huwebes, Enero 23, 2025, didto sa Barangay San Isidro, Lungsod sa San Fernando, Sugbo.
Ang biktima giila nga si Armando Cañedo, head internal security officer sa Azora Holdings Inc. nga taga Barangay Valencia, Siyudad sa Carcar, namatay dihadiha human gipusil sa duha ka wala mailhing mamumuno samtang padulong mopauli human sa iyang duty.
Sa follow up interview sa SuperBalita Cebu, nasayran gikan sa hepe sa San Fernando Municipal Police Station nga si Police Major Michael Gingoyon nga ang biktima nagpadulong sa iyang giparking nga motorsiklo aron sa pagpauli apan giduol siya sa duha ka wala mailhing lalaki ug gitabangan ug pusil sa makadaghang higayon sa nagkadaiyang parte sa lawas nga niresulta sa iyang kamatayon.
Human sa maong hitabo, daling nisibat ang mga suspetsado sakay sa motorsiklo nga gimaneho sa ilang kauban.
Matod ni Gingoyon nga ang biktima siyam pa lang ka bulan nga nadestino sa maong kompaniya apan adunay mga gwardiya nga wala kauyon kaniya tungod sa pagkastrikto niini.
Si Gingoyon nagtuo nga ang motibo sa maong insidente naggumikan sa pag-recommend ni Cañedo sa iyang mga kaubang gwardiya nga ipabalhin sa laing puwesto.
Nidugang ang hepe nga estrikto sa ilang trabaho ang biktima ug gusto niya nga walay magpabadlong sa iyang mga sakop. Nagkanayon si Gingoyon nga aduna na silay person of interest apan dili pa nila kini nganlan tungod kay nagpadayon pa ang ilang imbestigasyon.
Ang mga miyembro sa Scene of the Crime Operatives (SOCO) gikan sa Regional Field Unit 7 nakakuhag mga ebidensiya gikan sa nahitaboan sama sa mga kabhang sa bala aron maoy gamiton sa ilang imbestigasyon ug sa pag-ila sa mga suspetsado. / DVG
