Makapabalaka nga sud lang sa pipila ka oras niadtong Sabado, Pebrero 10, 2024, ang duha ka mga managlahing operasyon sa kapulisan sa dakbayan sa Sugbo nasakmit kini og balor sa gidiling druga nga moabot og P75.1 milyunes.
Unang operasyon gilusad sa Regional Police Drug Enforcement Unit (RPDEU 7) uban sa PNP Drug Enforcement Group 7 ug Regional Intelligence Division, alas 8:00 sa gabii sa sulod mismo sa Ludo Memorial Park sa A. Soriano Ave., Barangay Carreta.
Usa ka Elmer Saguran Barioga alyas Budok, hingkod ang pangidaron, ug giila sa kapulisan nga high value individual (HVI), nakuhaan og 10 kilos sa gituhoang shabu nga dunay standard drug price sa Dangerous Dugs Board (DDB) nga P68 milyunes.
Sa pagka alas 10:15 sa gabii, ang mga sakop sa City Intelligence Unit uban sa City Drug Enforcement Unit sa pagpangulo ni Police Lieutenant Lyndon Mondragon nilusad og buy-bust sa Nicolas Heights, Barangay Guadalupe ug niresulta sa pagkasikop sa miyembro sa usa ka dakong drug group sa Metro Cebu.
Ang suspek giila nga Christian Dave Canoy alyas Boshook, 22, 2nd year college sa usa ka unibersidad sa dakbayan, ug giila sab nga HVI, nasakmitan og 1,055 gramos nga gituohang shabu nga mobalor og P7,174,000 base sa DDB value.
Ang kadako sa kantidad sa duha lang ka mga operasyon sa samang adlaw makapahuklog ug makapanghupaw kita – misiaw na gyud pagbalik sa hingpit ang pagpapayuhot sa ilegal nga negosyo.
Sulod lang sa dili mominos duha ka oras ang gintang sa duha ka drug operations ingon na niini ka dako ang nasakmit nga gidiling drugas. Unsa na lang kaha kadako ang nakalusot o wala namatikdi sa awtoridad? Sama sa gikaingon nga ‘tip of the iceberg’ lang kini?
Usa ka mapaet nga kamatuoran nga ang pag-abuso sa gidling drugas nahimo nang usa sa mga hulga sa atong nasudnong seguridad.
Nasayod ka ba nga daghang kaso nga ngilngig nga krimen ang nahimo tungod sa pagkaulipon o ubos sa espiritu sa gidiling druga?
Busa, gikinahanglan pa gyod ang dugang nga edukasyon aron paglikay sa drugas nga makaadik ug makadaot sa pangisip sa tawo.
Labaw sa tanan, abagan nato ang awtoridad sa kampanya sa pagsumpo sa pagpayuhot og druga diin ang kabataan sagad mabiktima niini.
