NAGPAHIMANGNO ang Department of Social Welfare and Development-Davao Region (DSWD-Davao) ngadto sa publiko bahin sa pagkatag sa “fake news” ug nagkadaiyang matang sa pangilad nga naghitak sa online, naghanyag og “cash gifts” pinaagi sa pag-click sa online questionnaire survey.
Human sa pagdagsang sa samang “online phishing link” niadtong Disyembre 2024, panahon sa kapaskohan, gikompirma ni DSWD-Davao regional director Vanessa Goc-ong ngadto sa SunStar Davao nga ang ilang ahensiya “does not distribute cash gifts to individuals without proper guidelines or in violation of laws issued to the department for implementation”.
Sayo niining semanahana, Enero 2025, nakamatikod ang SunStar Davao nga daghang netizens sa Facebook nakig-ambit sa samang “unverified link” apan ang domain o website dili “affiliated” sa DSWD.
Ang link nihatag og upat ka managlahing mga pangutana kon diin mga indibiduwal giingong makadawat og P7,000 cash assistance isip kabahin sa gasa sa New Year sa ahensiya.
Ang komon nga pangutana naglakip sa background sa DSWD ug ang iyang papel isip ahensiya sa gobyerno.
Samtang gilipat sab sa link ang mga tawo sa pagpaambit og mga sensitibo ug personal data sama sa edad, pagkatawo, ug lokasyon aron nga mahatag ang ilang tabang pinansiyal.
“To ensure the accuracy of any information you receive via social media, please verify it through our official Facebook page: DSWD XI – Davao Region. Follow and like our page to stay informed with proper and accurate updates,” pagklaro ni Goc-ong.
Kasamtangan ang DSWD central office nihimo na og pagtagad sa naghitak nga “scheme” sa social media, ug nagkanayon, “Walang katotohanan ang kumakalat na link na nagsasabing makatatanggap ng CHRISTMAS GIFT na nagkakahalagang P7,000 mula sa DSWD kapalit ng pagsagot sa isang survey questionnaire.
