Daghang preparasyon na ang gihimo alang sa umaabot nga piniliay sa mga opisyal sa barangay ug SK sa tibuok nasod.
Apil na niini ang pagtigom og daghang mga papel de bangko alang sa pagahimuon nga “special operations” panahon sa pagtak-op ug ngadto na sa adlaw sa piniliay mismo.
Lisod na pangitaon ang mga tag P100, P50 ug P20 nga papel de bangko.
Ang mga kandidato naghimo na sa ilang kinaugalingon nga pagpangandam alang sa ilang kampanya, apil na niini ang uwan-uwan alang sa mga botante.
○ ○ ○
Usa ka konsehal sa lungsod adunay problema. Ang iyang asawa iyang gipalansad nga kapitan sa ilang barangay.
Walay undang ang ilang gihimong pangampanya aron pagseguro sa iyang kadaugan, apil na niini ang pagtigom og daghang kwarta.
Tuod man, sa dihang gipangutana siya kon andam na ba siya, dali kaayo mitubag ang konsehal nga andam na kaayo. Ready na ang ilang kahimanan aron pagseguro nga modaog ang iyang asawa.
Unsaon man nimo pagseguro kon mogamit ang mayor sa kapulisan aron babagan ang pagpanghatag og uwan-uwan sa mga botante, pinaagi sa checkpoint. Mao kini pangutana sa iyang amigo.
Nasayod ang amigo nga kontra ang konsehal sa mayor ug nibahad pa ang mayor nga himuon niya ang tanan aron pagseguro nga mapildi gyod ang asawa sa konsehal.
Dugay nga wala makatubag ang konsehal. Wala niya maapil pagkwenta ang posibilidad nga gamiton ang kapulisan sa mayor pinaagi sa pagbutang sa mga checkpoint sa mga lugar nga agianan sa katawhan. Kon butangan og checkpoint sa bisperas sa piniliay, unsaon man paglusot ang iyang runners nga nagdala sa uwan-uwan, labi na kay nailhan na ang iyang mga runner sa kaatbang.
Pitok-pitok lang intawon ang konsehal. Wa gyod siya masayod sa paagi nga maseguro nga madawat ang iyang uwan-uwan sa mga botante.
Sayon ra kaayo na, matod pa sa anak sa konsehal.
Nakalitan ang konsehal kay wala siya magtuo nga naminaw diay ang iyang anak ug aduna pa gyod solusyon sa problema.
Unsaon man beh, nangutana ang konsehal.
Ihatag daan ang mga uwan-uwan sa kasaligan nga mga leader sa kada purok pipila ka adlaw sa dili pa ang piniliay unya idungan kini paghatag sa mga botante sa bisperas sa piniliay. Kon buhaton kini, wala nay mahimo ang mga checkpoint nga ibutang sa mayor, maoy pasabot sa anak.
Husto tuod noh, nakapanglingo-lingo ang konsehal.
Husto ba ang ilang gibuhat?
○ ○ ○
Nasuko ang usa ka negosyante.
Tiaw bay way undang ang tawag sa pipila ka mga kandidato alang sa ilang ayuda gikan sa maong negosyante. Tanang tawag pulos nagdali, nagdali nga madawat na ang ayuda aron maseguro nga mahatag kini sa mga botante.
Ang gikasuk-an pa gyod sa negosyante kay ang mga nanawag nagsalig nga siya ang mosulbad sa ilang problema sa mga papel de bangko sama sa tag P50 ug tag P20.
Dili kuno madawat ang tag P1,000 ta og P500 kay ang ilang gikinahanglan kanang tag P50 ug tag P20 ra gyod.
Kamo pay mangayo, kamo pay magbuot, nagbagotbot ang negosyante. Pero bisan kon nagbagotbot, padayon lang gihapon ang negosyante sa pagpangita sa mga papel de bangko nga gikinahanglan sa iyang mga amigo.
○ ○ ○
Kon kwarta lang gihapon ang basehan aron modaog ang kandidato sa piniliay, aduna pa ba kaha chance nga mouswag ang atong nasod?
