Nalandig sa tambalanan ang drayber sa motorsiklo human kini nibangga sa usa ka taxi nga giingong ni-counter-flow, alas 5:15 sa buntag, Biyernes, Enero 31, 2025, sa dan General Maxilom, Barangay Carreta sa Dakbayan sa Sugbo.
Wala pa hingpit nga mailhi ang biktima apan ang nakarehistro sa iyang Yamaha Mio nga gimaneho mao si Jose Cris Mayorga.
Ang biktima nakaangkon ug kadaot sa ulo ug nawong human malagpot sa dihang nabangga sa atubangan sa Ken Taxi nga gimaneho ni Padillo Bardoc Villaleon, 43, taga Purok 5, Gabi, lungsod sa Cordova.
Sa paghulagway sa mga miresponde nga mga traffic personnel sa Cebu City Transportation Office daw sa nagusbat ang tuong nawong sa biktima ug giingong naputol ang dila niini.
Unang mibutyag si Villaleon sa interview sa DyHP RMN Cebu nga kusog ang dagan sa motor ug mipugos gyud matud pa kini sa pagliko bisan na ka red signal.
“Ako maoy go signal sir nya ang motor ang stop, hubog man kuno to mo left turn siya pero kusog iyang dagan mipugos gyud siya pag left turn, mao to naigo gyud siya nako,” matod ni Villaleon.
Apan sa imbestigasyon sa Traffic Enforcement Unit (TEU) sa Cebu City Police Office sa pagpangulo ni Police Lieutenant Colonel Jomar Medil, nasuta base sa kuha sa CCTV camera nga ang Ken Taxi padung sa Barangay Carreta samtang ang motor moliko pawala sa A. Soriano apan pag abot sa tunga-tunga sa eskina ni-counterflow matud pa ang taxi nga maoy hinungdan sa pagkabangga niini.
Tungod sa kakusog sa bangga, nahagsa ang biktima sa sementado nga karsada samtang ang iyang helmet nalagpot sa hood sa taxi.
Ang biktima daling gidala sa Emergency Rescue Unit Foundation (ERUF) sa Cebu City Medical Center, samtang ang driver sa taxi gikustodiya sa TEU. / AYB
