GIHIMAKAK sa vlogger nga si Ro-nie Suan, 25, naila sa social media nga Boy Tapang nga iyang gidagmalan ang iyang kapuyo, hinungan nga nabilanggo sa Alcoy Police Station.
Kini maoy gibutyag ni “Boy Tapang” dihang nahinabi sa Superbalita Cebu human siya nakagawas sa Alcoy Police Station niadtong hapon sa Huwebes April 3, 2025, dihang gireklamo sa iyang 21 anyos nga kapuyo nga nangulata.
Si Boy Tapang, nakagawas human nakapiyansa og P3,000 sa reklamong Violence Against Women and Children (VAWC) sa korte sa Lungsod sa Argao. Samtang niduso og affidavit of desistance ang kapuyo.
Gipanghimakak sa content creator nga iyang nakulatahan iyang kapuyo, apan giangkon nga nagkalalis sila human nga iyang gibadlong sa pagpanigarilyo gamit ang vape.
Supak si Suan sa maong bisyo sa iyang kapuyo na nga bag-uhay lang nga nanganak. Ang nahitabo usa lang ka away pamilya.
NAGPASAYLOAY
Sa police station nagkasabot ang duha ka habig ug gipasaylo siya sa iyang kapuyo. Apan ang maong kaso naduso na sa Piskaliya.
“Na okay na man mi diri kay gipasaylo ko niya dili na mopadayon sa kaso. Pero naduso na kini sa Korte natanggong ko. Giubanan na lang ko niya dinhi sa police station natulog,” dugang niya. / GPL
