Usa ka barko ang nidasmag sa nag-angkorahe nga fastcraft sa Pier 3, Dakbayan sa Sugbo sa alas 4:00 sa kaadlawon, Sabado, Hulyo 26, 2025.
Gikumpirmar ni Lieutenant Junior Grade Abel Lomboy, tigpamaba sa Philippine Coast Guard (PCG) Central Visayas ngadto sa mga tigbalita ang maong insidente.
Base sa pasiunang imbestigasyon nga usa ka ferry allision ang nahitabo tali sa MV Lady of Good Fortune ug MV Starcraft 7.
Ang MV Lady of Good Fortune usa ka passenger vessel ug roll-on-roll off (Ro-Ro) ang giingong namatyan og makina sa dihang modunggo na unta niadtong higayuna sa Pier 3.
Tungod sa maong engine failure nagpautaw-utaw nalang ang barko ug naanod sa sug ug didto nipaingon sa nag-angkorahe nga MV Starcraft 7 sa maong pantalan.
Maayo nalang nga way gikatahong nakalas o naangol sa maong hitabo. / ANV
