PADAYON nga gipalig-on sa Disaster Risk Reduction and Management Office sa Department of Agriculture-Davao Region (DA-Davao) ang paspas nga balidasyon ug pagsusi sa mga danyos sa sektor sa agrikultura sa Davao Region.
Giangkon ni Joedel Leliza, focal person sa DRMM nga duna pay daghang mga hagit sa pagdokumento sa mga danyos sa sektor sa agrikultura tungod sa kakuwang sa kapasidad sulod sa lokal nga panggamhanan aron ibalidar ang naapektuhan nga mga lugar.
“We need to prepare our LGUs, pinakauna namo nga gina-work out karon is to strengthen their reporting system because didtoa ta sa report maka access ug intervention and funds,” tug-an niya atol sa techtalks niadtong Biyernes, Pebrero 28, 2025.
Isip resulta, ang region-wide training himuon alang sa mga LGUs aron sa pagtubag sa maong isyu. Matud niya nga krusiyal nga madokumento ang tanang mga danyos aron sa pagseguro sa saktong datus ug paghatag og tabang sa mga naapektuhan.
Gibutyag ni Leliza nga gikan 2003 hangtud 2019, naalkanse ang Davao Region og P200 bilyones sa agrikulutra tungod sa kalamidad ug ang ihap tungod sa pagbaha. Unya gitin-aw niini ang panginahanglan alang sa disaster preparedness sa community level apil na ang mga mag-uuma.
Sulti sab niya nga niadtong 2024, ang shearline ug Low Pressure Area (LPA) nipaalkanse og mga P1.4 bilyones nga kantidad sa agrikultura sa Davao Region. Sa maong ihap, P661 milyones sa humay, P86 milyones sa mais, P625 milyones sa high value crops, P57 milyones sa kahayupan ug manokan, ug P61 milyones sa irigasyon.
Ang papel sa DRRM mao ang pagmentinar og updated data sa mga tanum, kahayupan, kaisdaan, ilabi na sa mga disaster prone areas aron nga mamonitor ug mapasayon ang mga danyos ug panginahanglan sa sektor sa agrikultura ilabi na sa panahon sa kalamidad.
Nihimo sab ang buhatan og mga surveys sa disaster areas aron sayron ang kahalapad sa mga danyos sa pananum, kahayupan ug mga isdaan. Rojean Grace G. Patumbon
