NAKUHAAN og dul-an P5 milyones nga balor sa ilegal nga drugas ang usa ka ex-convict atol sa buy bust nga gipahigayon sa Special Drug Enforcement Unit sa Parian Police Station sa Huwebes sa gabii, April 3, 2025, sa Sitio BSJCO, Barangay T. Padilla, Dakbayan sa Sugbo.
Ang 35 anyos nga suspek giila nga si alyas Derek, ulitawo nga taga Sitio Kabulihan, Barangay Guba, Dakbayan sa Sugbo.
Nakuha gikan kaniya ang 715 gramos sa gidudahang shabu nga mobalor sa P4.8 million.
Ang mga otoridad nipahigayon og buy-bust human nasayran nga nibalik si alyas Derek sa iyang ilegal nga kalihukan human kini nakagawas sa bilangguan usa ka bulan ang milabay.
Samtang didto sa Sitio Puntod, Barangay Mambaling, Dakbayan sa Sugbo, nadakpan usab ang usa ka high value individual nga giingong mokita og minilyon matag semana gumikan sa pagpamaligya og ilegal nga drugas sa alas 9:55 sa gabii sa Miyerkules, Abril 2, 2025.
Ang suspek giila nga si alyas Roger, 33, ulitawo nga taga Sitio Naba sa maong barangay.
Ang mga sakop sa Mambaling Police Station nga gipangulohan sa ilang hepe nga si Major Michael John Arandia maoy nakadakop sa suspek nga nakuhaan og 70 gramos sa gidudahang shabu nga mobalor sa P476,000.
Giandam na sa kapulisan ang kaso’ng kalapasan sa Republic Act 9165 o Comprehensive Dangerous Drugs Act of 2002 batok sa mga dinakpan. / GPL
