Usa ka lalaki gidakop sa polis nga natayming nakaagi sa dapit human nakit-an kini nga dunay tak-in nga armas sa hawak, nisuway sa pagpusil kaniya apan nipagar o wala mobuto.
Nahitabo kini sa Sitio Calvary, Barangay Apas, dakbayan sa Sugbo, alas 12:15 sa kaadlawon sa Biyernes, Oktubre 20, 2023.
Ang suspek giila sa mga residente sa dapit nga si Relan Coquia Dutallas, 37, taga dalan Mactan, Dutallas Compound sa Apas.
Sigun ni Police Staff Sergeant Roland Bilocura nadestino sa Cebu City Police Office (CCPO) nga padung siya nga mouli sa ilang balay apan iyang nasugatan ang suspek sa daplin sa karsada nga nagtak-in og armas sa hawak.
Apan sa dihang iya ning gisita, gikuha na hinuon niya ang armas ug dayong tion sa polis ug gikablit apan wala kini mobuto.
Dali niya ning gidakop ug giposasan ug gikuha ang armas nga kalibre 38 nga dunay tulo ka bala ug gidala sa Mabolo Police Station.
Giangkon sa suspek nga mag-atang siya sa karsada aron huwaton nga moagi iyang amo nga usa ka Madam IB (dili tinuod ngan) aron paninglon ang P9,800 nga suweldo niini sulod sa duha ka mga semana.
Apan tungod kay dugay kini mobayad, iya kining hadlukon sa dala niya nga armas.
Kasong grave threat, illegal possession of firearms ug Comelec gun ban ang atubangon nga kaso sa suspek.
