NATUMBOK na sa kapulisan ang suspek nga nirapido sa mga nagtagay og ilimnong makahubog 10:15 sa gabii, Dominggo, Mayo 26, 2024, sa South Cotabato.
Sa maong hitabo, upat ka tawo ang namatay nga mao sila Jerry Yuarata, Ronald Vallespin, Argie Vilorente ug Marcelo Combiz samtang angol si Freddie Reyes, pulos mga molupyo sa Purok 5 Luayon, Barangay Dumodalig, Tantangan, South Cotabato.
Sa taho gikan sa Tantangan Municipal Police Station, nasayran nga nag-inom ang mga biktima sa atubangan sa balay ni Yuarata sa maong dapit.
Apan kalit lang nibutho ang usa ka wala mailhing lalaki ug gipangrapido ang mga biktima gamit ang M16 Armalite rifle kung diin abtik sab nga niiktad sakay og motorsiklo sa naghulat niini nga kauban daplin sa kalsada.
Patay gilayon ang mga biktima nga nakaangkon og daghang mga samad pinusilan sa nagkadaiyang parte sa lawas samtang ang naangol gihatud sa balay tambalanan.
Narekober atubangan sa balay ni Yuarata ang 37 ka mga basiyo sa bala sa M16 Armalite rifle nga gigamit sa pagpamusil.
Padayon pa nga gipangita ang suspek nga wala pa panganli sa kapulisan samtang gipasaka na ang tukmang kaso batok kaniya. (EEF)
