TULO ka lalaki nga mga gun-runner ang nadakpan sa gilusad nga buy-bust sa Criminal Investigation and Detection Group-Cebu Provincial Field Unit alas 10:11 sa gabii, Lunes, Pebrero 10, 2025, sa Sitio Tagaytay, Barangay Vito, Lungsod sa Barili.
Ang mga suspek giila nga silang John Carlo Taboso Quijoy, 37, taga Barangay Saksak, Lungsod sa Aloguinsan, Jade Bharley Acruz Bulawan, 26, taga Tagaytay, Vito, Barili ug Julius Vaillacura Hisola, 40, taga Purok 6, Kantabugon, Lungsod sa Aloguinsan, Cebu.
Nakuha gikan sa mga suspek ang duha ka kalibre .45 nga pistola ug usa ka 357 nga revolver, duha ka magazine sa kalibre .45 ug mga bala niini.
Ang CIDG-Cebu Provincial Field Unit nakadawat og impormasyon nga ang tulo nalambigit sa pagpamaligya og mga armas.
Gipaubos dayon sa monitoring sa CIDG ang tulo ug sa dihang ila nang nakuha ang kasayuran, ila kining gi-transact.
Sa dihang nisanong sa ilang pagpakaaron-ingnon nga mopalit og mga armas, giplano dayon ang entrapment nga kabahin sa flagship program sa CIDG nga “Oplan Paglalansag Omega”.
Dala sa mga operatiba ang buy-bust money nga P500 nga gipailawman sa siyam ka tag P1,000 fake money ug sa dihang natunol na ang bayad, gihimo dayon ang pagdakop.
Gipaubos na sa imbestigasyon ang tulo ka suspek kon asa sila magkuhaan sa ilang suplay nga armas nga ibaligya niadtong gusto nga mamalit niini. / AYB
