Napalgan nga wa nay kinabuhi ang usa ka 24 anyos nga ulitawo sa pagatpatan sa Sityo Ganghaan, Barangay Paknaan, Dakbayan sa Mandaue human naanod sa sug, niadtong mga alas 10:00 sa kagabhion, Biyernes, Agusto 15,2025.
Ang biktima giingong nisuway og luwas niadtong taxi nga naglutaw resulta sa kusog nga bul-og sa tubig-baha, sa pagtuo nga naa sa sud ang drayber sa maong unit.
Nailhan ang biktima nga si Jeremy Bolingket, residente sa 6.5 Zone Ahos sa naasoyng barangay ug duna kini lawom nga samad sa agtang.
Sa nasayran, si Bolingket kauban ang iyang mga higala nag-inom niadtong higayona apan sa dihang nakit-an niya nga adunay naglutaw nga taxi iya kining gigukod ug gilangoy kauban ang iyang higala nga menor de edad nga si alyas Macmac.
Gatuo ang duha nga adunay tawo sa sulod ang maong unit hinungdan nga ila unta kining luwason apan tungod sa kakusog sa baha, sila gibanlas.
Si Macmac nga nakapangupot og hose sa tubig ang naluwas, apan si Bolingket gikatahong na-missing.
Lakip nga nadala sa kakusog sa sug sa tubig mao ang usa ka multicab ug tulo ka mga motorsiklo nga gikan sa Sityo Ibabao 2, Paknaan nga pulos gi-parking ug gihulagway nga dili na mahitsura ug mapuslan pa.
Si Clifford Tarona, usa sa mga rescuer sa maong barangay ang nisaysay nga nakadawat og tawag ang ilang buhatan og nagpahibawo nga dunay na-missing hinungdan nga ilaha dayon kining girespondihan mga alas 10:00 pasado na sa kagabhion.
Apan tungod sa kataas sa tubig wa dayon kini mapalgi, pagkasunod adlaw sa Agusto 16 sa buntag na nakit-an si Bolingket nga wala nay kinabuhi.
Usa ka residente ang unang nakakita sa patay’ng lawas ni Bolingket, ang nisaysay nga sa dihang namunit sa mga gibanlas nga gamit, nakugang nalang siya dihang adunay tiil nga migimaw nga nasagol sa mga basura hinungdan nga nitawag dayon siya og tabang sa iyang mga kauban.
