Sa nagkaduol nga paghandom sa pasakit ni Hesu Kristo karong Holy Week, 12 ka mga indibidwal nga gikan sa St. Joseph the Patriarch Parish, Cebu City nga nagsul-ob sa costume sama sa disipolo ang nisuroy sa pipila ka mga dapit sa Barangay Mabolo.
Ang maong mga apostoles nga nagdala sa papel sa matag disipolo ni Kristo nga nagbitbit sa ilang props sama sa scrolls, krus, lamparilya ug uban pa.
Ilang gisuroy o gilibot ang mga kabalayan nga nagtanyag og pag-ampo, blessings ug adunay higayon moawit og religious songs.
Sa maong paagi, naghatag kini og kahusayan sa pagpuyo sa matag pamilya ug mapahinumdoman ang tagsatagsa sa mga kasakit nga nahiaguman sa Manunubos nga si Hesu Kristo hangtod nga siya gilansang sa krus alang sa kaluwasan sa mga sala.
Sa maong kalihukan, makadawat og donasyon ang maong grupo nga magamit nila sa bisan unsa nga proyekto sa simbahan.
Handumon sa mga Katoliko ang Semana Santa nga magsugod sa Lunes Santo, Abril 14 ngadto na sa Dominggo, Abril 20, 2025, ang Pasko sa Pagkabanhaw. / JUAN CARLO DE VELA
