Nibatog sa hayhayan
gamay abohong langgam
nga nag-inusara lang
ug wala nay kauban.
Ngano man nga nawagtang
ang kanunayng kauban,
siya ba gibiyaan?
Kamatuorang subo
kini ang nahitabo:
ang kapikas nahanaw
nitaliwan nipanaw
maayong pagkasapo
sa nilupad nga bato,
pintik sa batang pilyo!
Nidung-aw sa bentana
mama nagkugos bata
nga wa kakitag papa,
haskan tawon luoya!
Asa diay ang papa,
ni-abroad sa Ostrelya
o nag-ilis asawa?
Kini kamatuoran:
pait nga kapalaran
bata papa nawad-an,
nabiyuda ang inahan
kay papa demalas man
ug usa sa natungnan
nga napagan sa tokhang.
