NANAWAGAN karon ang Office of Provincial Veterinary sa Sultan Kudarat nga itaho gilayon ang kadudahang masakiton nga binuhing baboy ngadto sa municipal agriculturist o meat inspector alang sa hinanaling aksiyon.
Punting sa panawagan mao ang mga magbubuhi og baboy sa probinsiya, pinaagi ni Provincial Veterinarian Dr. Edwin Nacito.
Matud ni Nacito nga nakompirma ang mga kaso sa ASF sa mga barangay sa Lasak, Batangan, ug Telafas sa lungsod sa Columbio.
Namonitor sab sa mga barangay sa Baras, Katungal, ug Kalandagan sa Tacurong City; Barangay D’Lotilla sa Isulan; ug Barangay Daguma sa Bagumbayan.
Nasayran gikan kang Nacito nga ila usab nga gilubong ang mga nakumpiska nga baboy nga gibaligya sa Sitio Balisan, New Bantangan, Columbio sa kabalaka sa ASF.
Sa Lambayong diin adunay gidudahang mga kaso, giihaw dayon sa mga hog raisers ang ilang mga binuhing baboy imbis nga motaho sa mga awtoridad nga matud niya dili unta angayan.
Gitambagan ni Nacito ang mga hog raisers sa Sultan Kudarat nga mangayo og disinfectant sa ilang municipal agriculture office.
Nanawagan usab kini sa mga konsumidor nga dili mopalit og karne nga gidudahang gikan sa mga dapit nga adunay ASF. (Edgar E. Fuerzas)
