Kapin sa 300 ka mga suspetsado sa nagkadaiyang mga krimen nangadakpan sa nagkadaiyang mga unit sa Police Regional Office 7 atol sa duha ka adlaw nga Simultaneous Anti-Criminality and Law Enforcement Operation (SACLEO) nga nagsugod sa alas 12:01 sa kaadlawon sa Mayo 24, hangtod sa alas 11:59 sa Mayo 26, 2024.
Sa kampanya sa ilegal nga drugas, ang kapulisan sa Central Visayas nakasikop og 97 ka drug personalities nga niresulta sa pagkasakmit sa I,089,79 gramos nga gituohang shabu nga dunay standard drug price nga P7,471,772.
Nakasakmit usab sila og 5,000 gramos nga pinaugang marijuana nga dunay balor nga P600,000.
Wala usab magpaulahi ang paggukod sa kapulisan batok sa ilegal nga sugal, diin sila nakalusad og 79 ka operations, nga nisangko sa pagkasikop sa 156 ka mga sugarol ug pagkasakmit sa P13,877 isip sugal.
Gihingusgan pa sa PRO 7 ang ilang kampanya batok loose firearms labi na nga nagkaduol na usab ang midterm elections sunod tuig.
Nakasikop sila og pito ka mga tawo nga naghupot og armas nga walay lisensya atol sa gilusad nga 102 ka operations nga miresulta sa pagka sakmit sa 99 ka mga armas.
Samtang nakasikop usab ang kapulisan og 73 ka wanted persons nga dunay mga pending warrant of arrest nga giisyu sa mga korte.
Tungod niini gidayeg ni Police Brigadier General Anthony Aberin, hepe sa PRO 7, subay sa way hunong nga kampanya batok sa kriminalidad. / AYB
