Nagtingkagol sa bilanggoan sa Naga City Cebu Police Station sa Naga City, habagatang Sugbo, ang manghod tungod sa giingong pagbunal sa agtang sa iyang maguwang gamit ang puthaw sa Purok Cacao, Barangay. Inayagan, dakbayan sa Naga, alas 12:30 sa udto sa Dominggo, Nobiyembre 19, 2023.
Sumala sa kasaligang tinubdan sa Superbalita Cebu, ang biktima nga maguwang giila nga si Elbridge Amalay Lascuña, 54, minyo, samtang ang suspek mao si Melchor Amalay Lascuña, 52, pulos mga molupyo sa dapit.
Matod pa nga ang duha mga mekaniko ug gibinlan sa negosyo sa ilang amahan nga usa ka chassis repair shop sa mga sakyanan.
Matod pa nga ilang gitunga ang chassis repair shop ug nagkompetinsyahay sa ilang negosyo. Apan niabot sa punto nga naglalis sila kon kinsay mopaayo sa ilang shop.
Ang suspek nga nakapunit og puthaw, nibunal sa agtang sa iyang maguwang nga niresulta sa pagkaangol niini. Hinuon, luwas na ang kahimtang sa biktima.
Samtang ang suspek nadakpan sa hot pursuit sa kapulisan sa Naga ubos sa kamanduan sa ilang hepe nga si Police Lt. Col. William Humoc.
